【重建迫遷】
【本報訊】推土機兵臨城下，觀塘重建區十室九空，老街坊搬走了，只留下負隅頑抗的商戶，包括May姐。少女時代於高級時裝店做售貨員，看盡所謂上流社會的醜陋嘴臉；約7年前於仁信里開設毛冷店，賣毛冷之餘更將織冷衫手藝免費傳授予街坊，May姐以為從此可以踏實做人。但重建巨輪沒有放過她，市建局指她霸佔官地，既沒特惠賠償，又不合資格安置到街市重新開業。她慨嘆，只想靠自己雙手有尊嚴的過活，但重建摧毀了她心血。
記者：譚靜雯
觀塘重建區內的仁信里，大部份商戶已遷出，一間約300呎的毛冷店座落於馬路旁角落，色彩繽紛的毛冷球、人手編織的頸巾、冷衫掛滿店外，不時有學生、家庭主婦坐低學織冷衫。老闆娘May姐開毛冷店前，做過文員、售貨員、開花店等，「鍾意做手工藝，咪開冷舖，可以寓工作於娛樂，好開心識到好多志同道合朋友。」
May姐曾在高級時裝店做售貨員，見慣有錢人的嘴臉，「你要做有錢佬生意，每日都提心吊膽，一句說話都唔可以講錯，曾經有個sales同客講，我哋啲衫冇折頭，除非你買夠8,000蚊啦，個客即刻買咗8,000蚊，之後話以後唔會再嚟，因為你睇唔起我。」
在仁信里開檔多年，最令她印象深刻是趕製裙仔給即將埋葬女兒的母親，「有一次有兩個女人入嚟睇冷，問我織一條裙仔要幾耐，我話一個星期至10日啦，佢話趕唔切啦要再快啲，我就問咩事，佢旁邊個朋友就話，佢個女過兩日就要落葬啦，佢開個手機畀我睇，個BB先得歲幾。」
May姐聽到心酸，連日趕工編織，「嗰日晏晝開始，我行又織、企又織，好想趕到畀佢，24小時之內就打畀佢話織起，佢好感動，話個女可以着住走。」她說只有這些小區傳統生意才有人情味，「唔同大商場每個sales都係briefing完先行出嚟，就好似木頭機械人咁。」
沒簽租約不獲賠償金
重建推土機下，人情味濃厚的商店都難逃被摧毀命運，當年May姐一直都沒有簽租約，每月只交5,000元租金，但就因只欠一份文件，觀塘重建啟動，市建局指她不符合資格，既沒特惠賠償金，連競投近街市檔位資格都無。
「當年因種種原因冇登記，市建局要求我提出證據，證明喺度開檔，你要我搵咩證據呢？左右都係你哋（市建局）嘅辦公室，呢度每日幾十人出入，日日都見住我開檔，我病到死都坐喺度，你哋嘅良心咪最好嘅證據囉！」
提起重建，May姐就氣憤，狠批市建局做法死板，「我唔係渾水摸魚，我哋𠵱啲小市民冇咩文化，唔識得處心積慮呃特惠金，你硬係話我唔合資格，我覺得呢個社會好無公義，重建要以民為本，點解今日你嚟拎走我個飯碗，但話我一啲資格都冇？」被迫遷限期臨近，她只希望市建局還她清白。
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24