「金勞詹」詹培忠自從爆出借錢800萬元畀「前首席梁粉」張震遠應急之後，威名更加遠播，就連自稱識得隔空取物、又可以喺空盤中變出活蛇嘅江西萍鄉「氣功大師」王林都要拜佢為師，勁！話說早幾日，中國星（326）主席向華強嘅細佬向華勝喺灣仔搞咗個晚宴，詹培忠同𠵱家身在香港嘅王林都有份出席。
唔知王林係咪想跟詹培忠學財技、學炒股，食完飯，到咗唱歌環節，王林竟然無端端喺詹培忠面前跪低，話要拜佢為師，仲寫低「為中國服務」五個字畀老詹當作拜師禮。
詹培忠見慣大場面，都冇乜反應，但佢肯定冇意過王林兩道投資絕學，只會教呢個徒弟仔做人嘅道理！咁都啱，江西政府本月初宣佈，王林或有可能涉嫌非法行醫、詐騙、行賄、賭博等多宗罪，老詹教吓佢都好嘅。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange