由於晚晚一家大細坐定定睇飛機師的原因，昨天見到facebook懶好人介紹了一位我可能認識的朋友時，我沒有猶豫亦沒半點歪念就按了掣，而當半日後我興高采烈地想進一步了解這位新朋友陳法拉時，我發現她應該是一位男士，雖然冇其他目擊者在現場，但我肯定當時紅都面晒，然後一怒之下unfriend了「法拉」。
交友要小心，齋睇唔friend應該好好啦，但足球達人們的真心假意有時亦不易一睇就明，那些甚麼「瞓咗冇睇，阿班霸噚晚大炒對手幾球呀？」的post，就不知呃咗幾多熱心人士。而就算自己人周秀娜曾經喺娛樂版信誓旦旦話同里奧費迪南有幾熟都好，我都係保持一貫態度，冇圖冇真相去對待，直到前排佢哋兩位一齊帶住頂5號cap帽溫馨合照先至識向娜姐拜服。而當今時今日假相多過真相之際，我又寧願相信美斯前排嗰張同女伴頂頭槌相，原本係抱BB嘅家庭相，俾人惡搞有幾奇，總之冇錄像冇真相；求link呀唔該。
我上網驚俾人呃不特止，潮流觸覺又慢人一截，近排先識得追番啲《中國好聲音》嚟睇。嘩！一睇上癮，奇人異士個個唱得之餘，歌手評判亦手舞足蹈異常投入，當我經常俾佢哋撳掣揀人一刻而感動流涕時，竟然喺前幾日睇新聞見到嗰位好唱得嘅光頭妹話，其實邊個評判揀佢同埋佢又揀邊位評判係事先大會安排定嘅。吓！我死都唔信嘞，明明哈林、那英撳掣一刻，真係好似受到感召咁神聖喎，呢段傳聞我選擇唔話畀阿女知，等佢keep住信電視節目冇造假，同相信世界上係有聖誕老人一樣咁美好。
唔想俾人呃就最好有內幕，所以我想知韋斯咸啲堅料，通常都會睇球員同老闆嘅twitter，其中老闆蘇利雲個戶口有佢攬住個仔嘅合照，實信得過啦，點不知佢一排又話簽咗朗尼，一排又話蘇亞雷斯加盟，單單流料咁點先，嬲嬲哋睇真啲，原來個account係佢個仔嘅，而呢個仔得13歲，仲好風趣。
KEYMAN
now TV主持
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24