張家輝一身完美肌肉，相信是不少男士夢寐以求的，但家輝竟表明沒有下一次！他說：「《激戰》嘅狀況已經成為我嘅歷史，我對健身唔係太大興趣，實在太刻苦，花嘅時間實在太昂貴，我花費唔起個時間。有次紀念性畀自己就算，我冇打算留低呢個身形，我唔想刻意經營肌肉人形象，𠵱家已經回復番原本嘅我，冇乜線條，回復番正常生活。」
家輝指自己平時生活也是過「七」不食，晚飯後不會再飲食直至睡覺，他也不吃零食，保持瘦削身形，家輝笑說：「我喺網度見到朋友話我要變張家輝，唔係話變唔到，但有乜可能日日唔做嘢，早瞓、日日鍛煉，咁攰根本冇可能工作，邊花費得起咁嘅訓練過程，唔係做唔到，大家喺社會都要搵食，冇理由為咗咁嘅身體，拋低所有嘢。就算下次耶穌做導演，如來佛祖做監製，叫我都唔會再做多次，我真係做唔到，我又唔係要做史泰龍，我都係想演戲啫，我係履行自己任務啫，我唔係諗住去嗰個形象發展。」
期待香港觀眾反應
《激戰》未上畫，已奪得上海國際電影節的最佳男演員和最佳影片，家輝表示反而最期待香港觀眾的反應，對於獎項不會想太多，他說：「畀獎我會好開心，對我係好大鼓勵，唔畀我唔會好失望，唔畀都係要做，咁咪出年再嚟過囉。」近年家輝專挑劇情片演出，他承認推掉一些小品及愛情片：「我鍾意濃味、重戲劇味道嘅戲，等我燃燒夠先，劇情片係我個人偏好，我仲未覺得攰。」
此外，張家輝昨日到旺角行人專用區宣傳電影《激戰》，導演林超賢和小演員李馨巧也有現身，吸引過百市民圍觀，家輝說：「好耐冇嚟過旺角，耐到都唔記得有幾耐。」不少人看過首映及試映後都讚家輝演技出色，比他獲七料影帝的《証人》還要好，他說：「之前都攞咗一個獎，希望可以超越《証人》。」
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24