兩支盡收天下兵器嘅歐洲豪門，上周五就喺各自聯賽揭幕戰登場；豪使過億歐元嘅巴黎聖日耳門（PSG），打多一個情況下先作客逼和蒙彼利埃1:1，首場法甲就失分；拜仁慕尼黑就好啲，德甲首戰主場3:1擊退慕遜加柏，但「讓球主客和」就開唔到「主勝」。
PSG以衞冕身份出戰，以6,400萬歐元（約6.5億港元）轉會費引入嘅標王前鋒卡雲尼，暫列後備，教練白蘭斯可能覺得靠伊巴謙莫域同拿維斯，已經夠贏前季冠軍蒙彼利埃。好衰唔衰伊巴10分鐘喺中圈扭失波，俾主隊逼甩兼打反擊，由雷米卡比拿近門射入，蒙彼利埃領先1:0。好彩伊巴都識將功補過，60分鐘頭槌二傳畀麥士維近門射入，追成1:1，之後蒙軍後衞艾卡奧達利兩黃一紅被逐，以眾凌寡嘅PSG，72分鐘更換入卡雲尼，同伊巴打個雙塔前鋒組合，不過始終未能反勝，作客拎得1分。
雖然失分，白蘭斯仍然死撐新兵卡雲尼對辦，呢位前法國國家隊教練賽後話：「卡雲尼表現好好，仲有入波機會，但只係俾對手阻住；佢歸隊得10日，仲未有100%狀態，所以我都幾滿意。」PSG今夏已經花咗1.1億歐元擴軍，但白蘭斯似乎都唔滿足，最新仲傳想簽埋紐卡素中場卡比耶㖭。雖然PSG錢多，但揭幕戰就累人輸錢，呢場PSG作客要讓半/一，「讓球主客和」又要[-1]，捧PSG球迷都要損手。
丹迪擺老烏陀衰家
首度領拜仁出戰德甲嘅哥迪奧拿，情況就比白蘭斯好好多；主場對慕遜加柏，由洛賓、文迪蘇傑同阿拉巴各建一功，以3:1勝出，衞冕有個好開始。不過最衰巴西中堅丹迪擺個烏龍，搞到要[-2]嘅拜仁，只開出「和局」。亞洲盤計，讓兩球/兩球半更要輸盤。不過響頭炮嘅哥帥賽後都開心咁講：「聯賽頭3、4場比賽好重要，因為可以踏出成功第一步，雖然部份球員未喺最佳狀態，不過我地都可以控制戰局。」
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24