一位文化界朋友一年前在飯局講過，佢好喜歡京都，二十年前曾經發夢在京都買一間屋，退休後長居京都，但當時日本樓價仍然幾貴，香港文化人點買得起吖，點知快速向前二十年，今時今日，文化人住在東半山嘅單位（四十年舊樓）竟然市價值二千萬元上下，高到佢自己都唔信，大有可能夢想成真，到京都買樓退休。
點解呀？今天香港樓市如一潭死水，成交量甚少，雖則居屋非常搶手，有了三辣招之後，港人不敢在港買樓，或不忿印花稅太高，好唔抵，改而向外地投資，是故不少英國樓盤來港推銷。日本自安倍晉三上台後，日圓大跌，日本樓租金回報可高達八厘（前幾日報紙報導），十分吸引噃。投資Ｒ心思思去日本買樓，剛啱碰到朋友Ｌ，順便講開，朋友Ｌ話：「我半年前到京都旅行，行完古寺之後，漫步京都，見到一啲出售字眼，於是留多兩日，打電話返香港搵Ａ銀行朋友介紹咗一個地產代理，由佢帶我與老婆去睇樓，一睇即刻買咗一間，以香港價錢計，好抵呀，在一個靜中帶旺區域，離地鐵站兩條街，一千六百呎，呎價三千六港元，即係五百八十萬左右，而且實用率極高。地產代理話，二十年前，業主用二億日圓買番嚟嘅喎。」
嘩嘩嘩，日本業主蝕得慘咯，投資Ｒ幾乎灑下同情之淚，不過佢係投資者，具鐵石心腸，話咁快就訂機票，下個星期到東京、大阪、京都睇樓。朋友Ｌ話：「租金回報一定係睇好東京嘅，京都比較靜，投資盤未必制得過，不過最近聽聞樓價向上，我層樓已經賺咗。」
故此嗰位文化界朋友大可將香港間樓賣咗，到京都買番一間，還有千零萬港紙剩低做退休金，以前係發夢，現在可嚴肅地諗一諗。不過話得說回來，我地唔識日文，在日本難與日人溝通，加上日本生活費昂貴，食碗麵都貴過人，冇錢好難捱。上星期六，見習生Ｙ帶兩位日本朋友到大埔街市打冷，三個人食到飽一飽，三百元有找，日本朋友幾乎唔信，因為三千日圓在東京都唔知食到乜！如果揸住千幾萬到泰國退休，如末日博士住在清邁，嚿錢有排搣。