【隔牆對論】
記：《蘋果》記者
林：林慧思父親林森成
記： 如果你在現場，你會怎麼做？
林：我諗我會同當日喺現場嘅男士一樣，同警察爭論，點解幾個鐘都未能處理青關會同法輪功嘅爭執？但係我唔會用粗口同警察開火，唔會針對前線警員，我個女當時係較為衝動。佢唔係有經驗嘅社運人士，最多一年只參加六四、7.1兩大活動，同警方正面交鋒嘅經驗甚少，年紀問題，我處理嘅手法一定會比佢好。
記：你講粗口嗎？
林：我粗人出身，行船做電機工程，粗口係日常用語，每朝早用粗口問候同事，係友善嘅表現。不過喺示威遊行，我知道對象係邊個，例如向中聯辦抗議追查李旺陽死因，我唔會向前線警員講粗口，喺屋企都唔會講，因為呢個場合冇必要用粗口。但係，當人好憤怒而冇其他語言可取代，講粗口係好自然嘅事。
記：如何看教協不容許為公義而爆粗？
林：今次對教協真係好失望，佢（林慧思）係你工會會員，你都未了解全件事就出幾句聲明，話林慧思言辭過激過火，又話「相信事件對學校和教職員均造成很大的困擾」。今次真係一件小事，因一句粗口而鬧到全城熱烘烘，佢始料不及，但你唔可以只針對呢句粗口，而唔理會佢出於同情心，因法輪功俾青關會多番包圍、阻止發言，香港有言論同埋表達自由，係核心價值，佢出手係為咗維護正義。
因青關會背後係共產黨發功，教協喺壓力下先發聲明。我做過司徒華嘅議員助理，（相信）華叔一定唔會發呢篇聲明，今時今日教協係唔係只做超市？會員遇到不公平指控，都唔站喺會員嗰邊。
記：是否警權過大逼小市民爆粗？
林： 睇過整條片嘅人都會留意到，警察威脅林慧思「再唔出去就拉你」、「要講番差館講」，用威脅說話刺激佢，於是佢喺好憤怒嘅情緒下講粗口。實際上，警察應該可判斷點樣處理衝突，假如兩個市民打交，警方好自然會分開佢哋，𠵱家青關會圍堵法輪功，係打壓其他人嘅言論自由，市民都覺得有問題，點解警察唔執法？共產黨覺得法輪功係邪教，青關會都唔等同正義，去負責消滅呢個「邪教」。
梁振英政府上場後，愛字頭冒起，青關會主力狙擊法輪功、愛字頭專門去踩場，回歸後呢種騷擾情況，香港人係不能接受。以前選舉期間喺路邊嘅橫額俾惡意破壞，警方都會向投訴人搜證，以我為例，警方真係會了解事件，認真處理，但𠵱家就唔會。前線警員面對青關會、愛字頭用暴力都沉默，反映上頭頒佈咗政治指令，令前線警員無法正常執法。
記：你89年後加入支聯會，90年代曾做區議員，你怎樣令子女關心香港時事？
林：六四事件令我醒覺，民主需要人民主動爭取，後來加入支聯會做常委，94至99年曾做觀塘區議會坪石區議員，因投訴民建聯陳鑑林懷疑選舉種票輸咗官司，訟費令我破產四年，破產後辭去支聯會常委，後來加入民主黨、前綫，我想有更多空間爭取民主，加入社民連。
子女觀察父母言行，90年代參加保釣行動、做區議員、上街抗議遊行，我做呢啲事，子女會去獨立分析，而林慧思鍾意歷史，佢了解香港同中國民主進程，接受良好家庭教育，佢知道喺不公義嘅時候，要出手幫弱勢。香港人、中國人比較怕事，唔想惹是非，見到有人不幸被車撞、被打，剩係袖手旁觀。有句名言影響我哋家庭，「當納粹黨來抓共產主義者時，我默不作聲，因為我不是共產黨員；當納粹黨來抓工黨成員時，我默不作聲，因為我不是工黨成員……當納粹黨來抓我時，這個時候已經沒有人可以為我發聲」，我哋唔可以漠視社會上有需要嘅人。
記：女兒受到嚴厲批評，你有何感受？
林： 針對林慧思嘅團體，睇準教會學校嘅「政治潔癖」，利用影響學校嘅手段，逼林慧思退縮，佢都不過係一名女性，呢啲唬嚇做法擺明係蝦女人。
今次已經發酵到變成文革式批鬥，一個弱小嘅小學教師，你唔需要對佢進行人肉搜尋，一件小事根本不必要放大，𠵱家已經不成比例。若果係一個恐怖分子，當然需要人肉搬尋，維護公眾安全，但佢只係幫法輪功問警察點解唔執法，𠵱家上綱上線，貼大字報、橫額等，根本係文革式批鬥。
mailto:[email protected]
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24