陳奕迅（Eason）早排開咗25場演唱會，尾場終於頂唔順，向觀眾發牢騷，不過嗰位歌迷又夠騎呢嘅，無啦啦嗌乜鬼嘢Joey先？講開又講，Eason以前開騷玩得好癲，最激嗰次肯定係02年喺台灣表演啦，只可惜high得滯撞爆咗睾丸！
事發喺02年4月，當日Eason喺台灣彰化一大學演出，唱到壓軸歌曲《Special Thanks To》時，原本諗住擺一字馬，再將頂帽拋落台下一起呵成。點知動作大得滯，Eason右腳踢空，跟住成個人滑向前，形成右腳喺舞台下，左腳喺舞台上，下體直接撞向舞台邊緣，之後Eason匆匆走返後台，唔使問，梗係痛到爆燈啦！Eason之後去咗台北國泰醫院睇急症，證實佢右睾丸撞破，要切除三分之一，好在冇影響生殖能力，算係不幸中之大幸；而阿女康堤就喺04年出世。
撰文：阿Wow
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！