因為參加無綫歌唱比賽節目《星夢傳奇》而為人認識嘅無綫主播林子博，噚日一家大細獲邀到尖沙嘴出席活動，之前喺節目中自爆多年前求婚冇戒指，一直引以為憾嘅林子博，憑呢段自白感動到好多人，英皇珠寶主席楊諾思知道後，即場送佢一隻價值九萬九千九百九十九嘅一卡幾鑽戒畀佢圓夢，子博老婆一見到就忍唔住喊咗出嚟，場面感人。子博話好多謝無綫高層樂易玲同楊諾思：「嗰集播出後第二日樂小姐打畀我，叫我唔使擔心，我會有戒指。我開頭以為佢安慰我，之後先知係真，我嗰下都呆咗。」子博又自爆前晚同囝囝揀戒指時要用扭蛋賄賂囝囝保守秘密。
何傲兒謝絕靚仔
同樣有份參加《星》嘅何傲兒，雖然經已出局，不過就成功贏咗人氣，繼前排話去澳門做嘢搵真銀後，噚日又去咗坑口出席商場活動。何傲兒好識做話俾現場氣氛感染，覺得好有童話feel，問佢有冇幻想白馬王子幾時出現？佢話：「我仲等待緊呀！我唔鍾意靚仔，最緊要係心哋好，可以照顧到我就得，不過最重要係過到我爹哋嗰關。」佢仲話啱啱入行嗰陣唔敢同男仔單獨去街，但係呢兩年開放咗自己，會同男仔去街食飯。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！