傳說中有一種油可令人金鎗不倒，就像影圈屹立多年的曾志偉，對作為「星二代」、其子曾國祥（Derek）來說，就像是沾了點油光，起跑線也比人前，但活在「志偉個仔」的陰影中，要闖出名堂原來絕對不比別人容易，有時神油也會變成油渣。Derek終於在新作《飛虎出征》中完全豁出去，扮基做差佬叫泰鴨一鋪過，主要就是不想再因父之名。Derek對於成功的評語是「革命尚未成功，同志仍需努力！」外加幾聲志偉配音的笑聲。
撰文：文國駿
承接《低俗喜劇》去年票房大賣兼引起一股低俗文化，隨後引發內地女生賈選凝的影評事件，不論戲內戲外也充滿話題性，成為去年熱話。
彭浩翔與杜汶澤這班底今年再下一城製作《飛虎出征》，雖然未知賈選凝會否再為電影執其大筆寫影評，但兩者的共通點除了同樣票房大賣及依舊低俗外，它們也在意想不到下捧紅了戲中的配角，《低俗》有鄭中基，今次憑《飛虎》上位的應是曾國祥。Derek於戲中飾演一名同性戀飛虎隊員，為了掩飾性傾向而頂硬上陪杜汶澤及余文樂等到澳門尋花問柳，下體誤搽神油令他全套戲中也「誓不低頭」固然是笑點之一，但當他看到外籍男妓時的發姣樣更是一絕。
父親的影子
日前Derek於尖沙嘴接受本報專訪，拍照時他應攝影師的要求模仿一下父親曾志偉的笑容，他卻主動提議：「不如我扮呢個啦！」結果一副矇眼嘟嘴樣果然像極志偉，但要求他再扮另一個曾志偉式甫士時他卻婉拒了，這也對的，誰希望只做父親的影子？
問到Derek出道多年皆被稱呼為「曾志偉個仔」曾否介意？他坦言：「以前細個梗係好介意啦，𠵱家大個咗諗嘢叫做成熟咗，又俾人叫慣，就會冇咁介意囉，阿Q啲諗，我的確係老竇個仔嘛，人哋又冇講錯喎！」他說這名號對他不僅是一個擔子，但同時亦給了他不少方便，Derek說：「曾志偉個仔喎，一開始入行時當然覺得特別大壓力啦，又怕人哋唔敢話我，點知最後個個對我要求特別高，哈哈！講真唔係剩係得壓力嘅，同樣我都係因為咁而比其他人多咗機會，好似我記得我係外國大學畢業前一年，我返咗香港過暑假，老竇無啦啦同我講我可以去Peter（陳可辛）間公司做，嗰陣我大學都未畢業可以喺大導演公司度做嘢，都係因為老竇。」
開放式管教
Derek表示父親由細到大對他的管教也採取「開放式」，如非必要從不多加意見：「我由以前讀書時期揀科，到𠵱家做導演做演員都冇乜點同老竇研究過㗎，全部由我自由發揮。」Derek又表示有機會希望與曾志偉父子檔上陣拍電影，他笑言：「到時如果我做導演，可以點番佢。」
Derek在《飛虎》中飾演的蝦米非常搶鏡，這是他自己也始料不及的，他說：「其實冇諗過大家會咁留意個角色，對我自己嚟講有啲驚喜，我一路拍時都係想將件事演繹得好啲。」今次Derek飾演蝦米雖不用拍攝男男親熱的鏡頭，但原來他毫不介意：「我唔介意，一路都想試吓做同性戀者角色，有機會可以再做㗎。我當然有同性戀嘅朋友啦，知道要拍呢套戲時，當然係出賣朋友嘅時間，同佢哋取經啦！」
難忘Brenda
演同性戀者要向朋友取經，那麼演嫖客時的心態向誰學習？Derek今次不惜出賣老竇，他笑說：「呢方面就聽老竇同導演（麥詠麟）講，佢哋成日話成班男人去滾係最佳聯誼活動，我自己因為應酬都有去過夜總會，話冇就呃你啦，但去嫖就真係冇試過。」
至於戲中由他所引發的笑位不少，問拍攝時最難忘是哪場戲份？Derek坦言是跟Brenda（林兆霞）所拍的一場床戲，他說：「拍嗰場戲忍笑忍得太辛苦，Brenda又係一個好玩得嘅人，而且演得好放！」
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24