【銅鑼灣】阮民安（Tommy）被稱為樂壇小強當然有道理，除咗生命力極強之外，佢嘅抽水能力亦好高，好似之前借同韓國人氣偶像G-DRAGON合照出位，就知佢自我宣傳有一手。原來Tommy嘅秘技唔止呢兩項，前日佢同一名女性友人行街，又展現佢作為小強嘅另一種能力，就係耐熱嘞！話說前晚7點鐘，雖然太陽已經落山，不過條街仲好熱，正當各人都努力抹汗之際，Tommy喺銅鑼灣崇光百貨門口出現，佢唔止戴口罩着風褸，個頭仲戴住頂厚冷帽，難得係Tommy仲一副悠然自得好輕鬆咁款，原來佢同一名女性友人行街。
齋睇唔買引人𥄫
望落Tommy個身形脹咗唔少，唔知係咪想用呢種方法焗汗減肥？佢同女性朋友首先行咗銅鑼灣地帶睇衫，主力集中睇tee，入到室內，除咗個口罩嘅Tommy一邊自己搵衫，一邊向身邊女友人介紹。
大約15分鐘之後，齋睇唔買嘅Tommy一出門就戴番口罩，兩個人行咗過景隆街另一間專賣貴衫嘅時裝店，佢哋企咗喺度望櫥窗，不過Tommy嗰身打扮即刻吸引咗店員出嚟，睇吓究竟係邊位天皇巨星，Tommy喺人哋門口擾攘咗5分鐘之後，就同朋友跳上的士走人。
採訪、攝影：梁繼光、楊浩賢
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！