今年港姐成日俾人話冇聲冇氣，無綫就諗住提供多一個渠道畀佢哋自我宣傳，喺tvb.com搞咗個fansbook欄目，原意畀佳麗貼圖留言，同粉絲互動吓。可惜個網宣傳力度不足，佳麗上個月尾陸續喺fansbook分享參選心得，不過留言人數只得小貓三、四隻，2號羅紫君同19號蕭穎詩hea爆索性唔寫，連日來只貼咗一張相，擺明用嚟應酬無綫。
不過亦有佳麗好積極，無綫到𠵱家仍未安排佳麗着泳衣，令估計有E cup上圍嘅「飛釘千雪」9號劉溫馨一直無法展現致命「胸」器，前日佢終於忍唔住出手，借fansbook平台show quali，佢着咗件杏色tube top側身露波罅，仲話：「今日的拍攝即將開始啦，可能其中有泳衣照，泳衣可以將女仔美好的身材展示的一清二楚，不過都要做好防走光的功夫，我會努力拍攝，到時大家看看我拍的怎麼樣吧，多謝支持！」似向其他佳麗挑機！
冇身材就賣萌
有身材要盡騷，身材唔夠好就惟有賣萌樣，好似16號徐韶蓓拎住支飲品做O形嘴，展現同港姐不一樣嘅cutie樣。18號張雪瑩就話自己成晚冇瞓，好似國寶咁現熊貓眼，嘴扁扁惹人憐惜咁。10號林伊麗話前日係11號吳瑋雯（Summer）生日，佢同15號蔡思貝齊齊嘟嘴送吻。而5號朱智賢更雙管齊下，日前放咗張做瑜伽嘅相，露出纖瘦腰肢，噚日又抱埋寶貝狗Donut扮錫錫。
是非多多嘅「黑色乳牛」13號歐陽巧瑩，就喺fansbook玩懺悔，話明知十分耕耘可能只得一分收穫，不過佢都會出一千分力去拎100分，仲寫住：「我對自己要求很高，亦不想犯錯而影響到他人！」
版主：陳基征
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24