噚日朝早場國際冠軍盃決賽，雖然講到尾都只係一場季前熱身賽，之不過戲碼係車路士對皇家馬德里，兩邊主帥都係倒戈，加埋摩連奴賽前同昔日麾下基斯坦奴朗拿度（C朗）有啲火花，令呢場波更加有睇頭。結果C朗喺決賽大踢爭氣波，梅開二度幫皇馬贏3:1，之但係佢同摩連奴喺場上就完全互相無視，零交流。
入兩粒皇馬贏國冠盃
摩連奴喺過去3年執教皇馬，雖然唔算係成績極好，但喺西甲同西班牙盃贏到各一次錦標都算係咁，據講摩帥離開皇馬時，已經幾乎得罪晒全隊球員，C朗都係其中一分子。加上摩帥日前挑起火頭話：「大哨先係真正唯一朗拿度。」之後C朗反擊話冇回應嘅必要，到咗星期四決賽，昔日將帥重逢，但已經變咗陌路人。
皇馬喺決賽由馬些路先開紀錄，車路士喺17分鐘由拉美利斯扳平；之後就到全場踢得非常拼搏嘅C朗發威，喺31同57分鐘各入一球奠勝。賽後C朗容光煥發，同施治等幾位車路士球員寒暄，就係冇摩連奴份；那邊廂摩帥都有同皇馬教練安察洛堤，同埋沙比阿朗素打吓招呼，但同C朗就全無交流。
零交流C朗講嘢有骨
摩連奴賽後都有講幾句敷衍嘢：「C朗梗係勁，佢有波入邊係新聞嚟，冇先至係。」C朗喺另一邊講嘢就更加有骨：「我完全唔會在乎其他人對我有乜睇法。」想當日大家仲攬頭攬頸，估唔到C朗同摩帥今時今日搞成咁。
同日較早時間上演嘅國冠盃季軍戰，AC米蘭有巴洛迪利先開紀錄，最後2:0擊敗洛杉磯銀河。
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24