提起官場鑽石王老五，唔少人即時諗起律政司司長袁國強，事關今年49歲嘅Rimsky係梁班子內唯一一位仍然單身嘅官員，名副其實係超級筍盤！有讀者向八方報料，話Rimsky日前同女性朋友行宜家傢俬，莫非已經名草有主？律政司司長發言人澄清，司長係同女性友人結伴去過宜家傢俬，但嗰位「絕對唔係」佢女朋友。
律政司回覆非女友
讀者向八方報料，話前日、即係周三晚上七點幾左右，喺銅鑼灣嘅宜家傢俬閒逛之際，竟然撞到袁國強。司長咁平民化，行宜家而唔係其他貴價傢俬舖，已經令呢位讀者好意外，但最令佢驚訝嘅係，仍屬單身貴族嘅袁國強，身邊有位女性朋友結伴同行㗎。
目擊者話，佢哋仲專攻燈飾同廚房用品，不時有商有量，似乎係搵緊禮物送畀朋友咁。唔知係咪因為係大庭廣眾呢，呢位讀者話佢兩個雖則一齊行，但都保持一定距離，舉止唔算好親密，唔知呢位女士係咪袁國強嘅女朋友呢？
八方就此向律政司司長發言人查詢，獲回覆司長當日係就係有去過宜家傢俬，但身邊嗰位絕對唔係佢女朋友。睇嚟一眾未有着落嘅女士們，希望仍然在人間喎。
mailto:[email protected]
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24