一句「what's the fxxk」，小學教師林慧思遭建制派批鬥，從人格引申到職業道德，家長聯會更聲嘶力竭斥她教壞細路，繼「中學生應否談戀愛」之後，「教師應否講粗口」成為另一迷思。
正退休前休假的警司劉達強更大聲疾呼：「如果有任何教授覺得自己講粗口係應份嘅，我祝福你！」佔中十大死士之一、浸會大學社工系講師邵家臻，正是得到劉sir祝福的幸運兒，他除為粗口著書立說，也不避諱在鏡頭前大聲疾呼：「X你老味！」
記者：潘婉玲 攝影：劉啟文
若根據「教師不應講粗口」的理論，44歲的邵家臻似乎早應執包袱走人。曾任外展社工，夠膽死於學生畢業短片中，扮演黑社會大佬「爆樽哥」，粗口如水銀瀉地，器官橫飛。
「曾蔭權都講狗噏啦，咁係咪特首就唔講得狗噏，淨係可以講豬噏或者亂噏？」教師講粗口教壞細路？「𠵱家乜春都話教壞細路，細路係咪咁易教壞？你覺得啲細路好流囉！」對於劉達強送上祝福，阿臻不想還拖，「『祝福你』都係英文粗口嚟㗎，其實即係God damn you」。
講錯文法 撐林老師非粗人
談到粗口文化，上一輩有黃霑，新一代應數邵家臻，多年前在某報的專欄撰文：「講粗口和篤背脊都要有氣質。」原來爆粗大有學問，他教精記者：「講粗口要配合抑揚頓挫，講笑同鬧人有唔同嘅方法，如果平時講嘢好快，講呢四隻字就要慢啲：『X~你~老~味！』」
由黃霑的《不文集》，到邵家臻的《唔X唔鬆化》，都教導港人講粗口除了要字正腔圓，也要講文法。邵家臻不怪林老師講粗口，只怪她講錯粗口，「林老師用錯grammar，中間加咗s，變咗『what's the fuck』，證明佢本身唔係一個粗人。何況呢句只係一句俗語」。
要著書立說，只因粗口於阿臻心中，蘊藏極高文化價值，「『門小』呢個字本身好有歷史根據，門係對腳，小係碌X，我覺得好精彩喎！2003年7.1，啲人喺度門（門字）入面寫董建華，呢啲咪叫創作囉！」要學好一種語言，先要學懂粗口，「南方語言其中一個重要寶庫，就係粗口，如果尊重本土文化，就要保留粗口」。
廣東話粗口，博大精深，用途也極廣泛，「粗口可以係親密同友情嘅表現，男男之間，見到面就X嚟X去㗎啦！」阿臻強調，自己睇場合爆粗，上課及在新朋友面前也不講，「我唔識你，我唔會同你（記者）握手就話：『咁X高嘅你？』。但如果我識咗你15年，我會話：『咁多年你都咁X高嘅？又高X咗喎！』同個hug（擁抱）差唔多啫。」
廣州香港粗口文化大不同
香港人講粗口，愛把男性器官掛在嘴邊，廣州人則加入女性器官，這理據用在阿臻身上同樣適合，「我喺香港長大，鍾意講X（男性器官），唔鍾意講X（女性器官），我早排返廣州，聽到老人家講：『我踩親你隻X！』『掌你嘅X嘴』，我覺得好鮮活，好抵死！」
阿臻出生草根家庭，自言「識行就識講粗口」，兒時偶爾被長輩以粗口責罵：「掌你個X嘴」，他也不敢問，嘴巴怎麼跟女性生殖器扯上關係，「嘩，我咁好學就變咗梁文道啦！」做不了梁文道，至少外型酷似，「X那星，有年書展，有個人拎梁文道本書畀我簽名，咁我咪簽梁文道個名落去囉！𠵱家留咗鬚，又俾人話似陳子聰！」他與梁文道相識十多年，份屬老友，「道長」偶爾向他投訴：「成日俾人話我拖住啲女，明明就冇！」拖女泡妞的其實是眼前這人。
阿臻隨心而行，百無禁忌，辦公室掛着寫上「Fxxkin' Politics」的油畫，也放滿不同花款的避孕套，全是旅行期間搜羅的收藏品，記者好奇，在辦公室可有用武之地？「我答你唔到喎，答到就瀨嘢！」記者說他分裂，他反駁這叫funny，說他是憤青，他堅持自己是文青，「我好鍾意邪中亦有三分正，正中亦有三分邪，步驚雲咁」。他也承認愛踩界，「大學係思變嘅地方，要touch一啲禁忌，唔係問why，係問why not、what if，例如如果校歌有粗口……」
明年佔中，強調和平集會，避免肢體暴力，阿臻作為十大死士之一，接受語言暴力嗎？「我覺得可以！如果無啦啦噴胡椒噴霧，仲唔what the fxxk？」
你想爆?幫你爆!
熱線電話：2990 7225
mailto:[email protected]
WhatsApp：9131 4511
講電影變講國情，阿澤彭導最後一星期做嘉賓，
未睇？即上《亂噏24》重溫！
http://bit.ly/appletalk24