去便利店買嘢為拎印花換公仔，仲要唔知換番嚟嘅，係唔係自已想要嗰隻。呢啲咁搵笨嘅遊戲，菲菲係唔會玩嘅。
偏偏呢個世界，好多女仔都迷戀呢類型遊戲，難怪7仔同OK，近年都樂此不疲，不停推出唔同卡通印花推廣。
OK的母公司利亞零售（831），前日派發半年成績表，撇除出售物業一次性收益，上半年純利按年跌幅為7.7%，主要係因為租金及勞工成本上升。
香港佔集團收入來源達94%，而集團核心業務係便利店同餅舖。如果舖頭唔夠多，好難同7仔及美心鬥。香港貴為全球樓價最貴嘅其中一個地方，就算租金只係企喺現水平，都已經夠利亞零售頭痕。
其二係，公司內地業務只係起步階段，除所得稅虧損條數，今年進一步擴大。然而，利亞唔好彩嘅係，咁啱內地𠵱家經濟放緩，OK同聖安娜想發圍難度大咗。
不過利亞知自己業績麻麻，cash又多，索性豪派特別息，令股價噚日逆市升。不過息誘呢招，就好似換公仔推廣咁，只頂到一時，長遠仍係要公司搵新增長動力，先可以支持股價。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange