周日689將會落天水圍做show，佢究竟想點呀？
一年前7月落區做爛show，已搞到一鑊粥，在屯門社區會堂搞到一片混亂，學民思潮舉牌抗議，揭開了反國教運動序幕。呢款townhall meeting早已成為爛show，地區專員及建制派「媽媽聲」。
為咗令場面不太難堪，早早安排定一大棚樁腳街坊扮平民百姓，入去問埋晒阿媽係女人及一早plan定之問題，畀689借機發表偉論。問題係呢類show早被傳媒鄙視，因為導演味太重。佢哋之所以仍去現場採訪，只有一個目的，就係睇睇有冇打交衝突場面報道。
低民望多曝光 有蝕冇賺
公眾從傳媒接受到嘅訊息，就只有一個字：「亂」，場內有人舉牌，場外有人攔車，衝入會場與保安衝突，如果愛字堆出動就仲過癮，「靜心」成為主角，689講過乜根本冇人理，亦無人報道。𠵱家資訊科技發達，根本唔需要townhall meeting呢類爛show去收集民意，因為效率太低且容易出事。
要進行有意義之政策諮詢，必須有主題、範疇及焦點對象，而非普羅街坊，比較接近focus group，先至會有料到。落區爛show一年後仍在進行，顯示了689冇learning curve可言，又或者身邊擦鞋仔當道，冇人願意講真話。
諮詢如果只係一種走過場形式主義，就必須計算得與失，即官場所謂有冇mileage，例如公關形象上有冇着數，但以今日低殘民望，加上囤地醜聞，警察介入政治等熱辣辣議題仍未消散，點計都只有蝕冇賺。其實，以689低殘民望，唯一PR就是匿埋，因為市民睇電視新聞見到佢大頭都會反感，唔曝光反而仲好，至少唔會挑起市民負面情緒。
習近平坐穩 689勢遭審判
官場中人認為689性格剛愎自用，別人認定會出事，佢反而會死去，包拗頸，你長毛來示威，我唔搞咪好失威冇面，明知冇用亦要搞。
呢種一錯到底之性格，中央官員看在眼裏，自然會反感。挺梁聲音越來越弱，好多人對佢保持距離，加上曾鈺成近排好勇武、積極，政圈一直傳當薄熙來案正式開審，顯示習近平權力穩固了，下一步便是處理香港事務，而到時689嘅judgement day便降臨了。
有部份人相信已經聞到陣除，紛紛開始活動起來，為自己未來政治前途打算。
689之處境，將更加孤立！
添馬男
五六年拍一部戲？講到嬲嬲哋，肥佬黎教王家衛拍戲！
想睇今周足本《亂噏24》？蘋果網站動Live預埋你。
http://bit.ly/appletalk24