匯控（005）前排炒業績炒到過晒龍，點知周一派成績表，差過市場預期，大笨象即刻好似失足咁，由高位碌返落去，除咗基金、散戶要走避，「抽水大王」官永義做大股東嘅永義實業（616）亦要閃，沽咗五萬幾股，賺得4.5萬元微利。
公司噚日公佈，話喺8月5號同6號，喺市場沽咗5.23萬股匯控，套現469萬元，每股作價介乎85.3元至89.6元。
匯控喺5號收市後先公佈業績，照咁睇，永義應該喺5號開市時，喺高位沽咁啲貨鎖定利潤，諗住翌日再收割，點知匯控業績差過預期，當晚喺倫敦已經急跌，永義翌日惟有跟大隊散貨，最終只獲微利4.5萬元，1%都冇呀，陰功豬，仲未計交易成本喎。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange