小弟上個月18號，喺4毫幾子時曾經介紹過嘅嘉輝化工（582）一破位就絕塵，噚日一度再升20%，收市仍升17.5%，如以介紹日開市價計算，已經升超過五成，可以話係小弟近期省招牌之作。既然內房殼股仲係焦點，今日一於繼續介紹另一隻內房靚殼——方正數碼（618，下稱方數）。
阿媽大把土儲 隨時注入
今年1月，方數轉型進軍內地房地產行業，先後收購江蘇同埋湖北物業，5月再購入湖南商住用地，確立為方正集團嘅房地產旗艦。翻查資料，𠵱家管方正集團房地產業務嘅係北大資源集團，喺全國嘅土地儲備約達8萬畝（一畝等於666.67平方米計，即高達5,333萬平方米），成為全國最多土儲嘅五強，仲要多過中海外（688）嘅3,649萬平方米，僅些微低過碧桂園（2007）嘅5,500萬平方米，而中海外同碧桂園嘅市值，分別高達1,900億同逾810億元，但方數𠵱家個市值先得18億元，假如北大資源求其注入一成土儲畀方數，方數個市值起碼都過百億元啦！
不過，小弟估北大資源最終會將所有資產注入方數，變相借殼上市，因公司5月底換入幾位新董事，全部係北大資源嘅管理層，尤其新任主席余麗（官方網頁嗰張相幾靚女）本身就係北大資源嘅總裁，搵佢坐落方數度，應為注資做準備。
嘩！如果全部注晒落方數度，真係不得了，如以碧桂園市值作參考，北大資源啲土儲嘅估值起碼值超過800億元，規模大過方數𠵱家個市值超過40倍，淨係呢點，方數股價起碼要爆升多幾倍啦，情況就好似恒力（169）咁囉！
新主席猛料 目標1.82元
仲有一點值得一提，呢位余麗小姐都幾猛料，佢2003年加入方正集團，好多單併購都係由佢一手策劃同執行，十年時間就將間方正集團嘅資產增長300幾倍，有「才女」美譽。仲有，佢上個月26號喺公司網頁度發表咗篇《總裁觀點》（查實都成兩年冇發表過觀點，但近期連發幾篇，擺明𠵱家做嘢啦），內文大概係話要地產同文化扯上關係，最終就係想講話要利用北京大學同方正集團嘅資源同優勢，同地產結合囉！
小弟覺得佢幾有計喎！𠵱家搞緊城鎮化，如果將來個社區有間名牌學府，都咪話唔好呀！
總括而言，方數早前嘅部份注資只不過係頭盤階段，主菜仲未上，所以趁佢仲未真正開波就要買，再加上公司日前發盈喜，話中期業績會扭虧為盈，有盈喜護體，大可放心買。
純睇圖表，佢剛剛突破上升三角形阻力，若上破1.2元頂部，就海闊天空，如要再訂目標，就以余麗早前獲公司所授出購股權嘅行使價多一倍，即1.82元作目標。
陳承龍
本欄逢周四刊登
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange