前日通訊事務管理局公佈今年初公眾對無綫、亞視節目嘅意見，無綫俾人彈劇集題材了無新意，但你有你鬧，無綫一向抱住橋唔怕舊，最緊要受嘅心態。早前搵咗歐陽震華（Bobby）同關詠荷（Esther）呢對老拍檔，合演新劇《情逆三世緣》，用穿越時空追女仔橋段取悅觀眾，唔知能唔能夠好似《陀槍師姐》咁，再創造收視奇蹟！
《情》劇下星期一播映，Bobby、Esther、朱晨麗同敖嘉年等噚日去咗長駐香港嘅歐洲高桅杆帆船幫劇集宣傳，由於現場好大風，黃智雯一直㩒住條裙怕走光。而眾演員被要玩求婚遊戲，Bobby仲大講有味笑話，教敖嘉年將「含蓄」掉轉讀，笑到個個合唔埋個嘴。
摸過家輝大讚
之後Bobby攬住Esther上演一幕《鐵達尼號》招牌甫士，Bobby笑住話：「呢啲甫士唔擺得，佢老公（張家輝）𠵱家好打得！」事後Bobby話：「家輝嚟過探班，我摸過佢啦，我同關詠荷講『你就好啦，一時瘦、一時肥、一時大隻』，我就得肥同肥啲㖭。其實我20幾歲都試過做兩個禮拜健身，一谷就有罅，到咗四十幾歲，做成個月得少少，所以好敬佩家輝。」
Esther話見《衝上雲霄II》收視好有壓力，仲爆Bobby話如收視好着t-back，Esther話：「佢講多過做。」Esther又指劇中佢50年代嘅造型好似佢奶奶，所以會叫奶奶同7歲大嘅囡囡睇：「初時囡囡唔肯睇，佢知我喺劇中死3次，所以佢未睇過家輝啲戲。」Bobby之前因為急促進食嗆喉致急性肺炎，搞到成班演員要跳拍，佢話都預咗請大家食飯。
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！