【荃灣】彭浩翔導演套新片《曼珠莎華》正在趕拍到如火如荼，早幾日佢為套戲專登訂做20米長嘅道具鯨魚，又畀熱心市民幫佢率先曝光，亦都睇得出佢部戲幾落本。前日下晝3點左右，導演拉隊去咗荃灣華人永遠墳場開工，嗰場戲楊千嬅、飾演佢老公嘅曾志偉、演佢老竇嘅吳孟達同吳家麗都在場，套戲仲有古天樂同梁詠琪演出，不過前日就搵咗兩個替身頂佢哋嗰位。
聽工作人員講去墳場呢啲陰地拍戲，事前事後都會拜四方求事事平安，而場戲要趕喺前日完成，事關噚日已經係立秋，即係話已經踏入農曆七月鬼節，所以凡事都係小心好啲。
吳孟達志偉吹水
前日開工都係一件苦差，因為烈日當空又冇瓦遮頭，所以見到成班演員拍咗一陣已經身水身汗，一唔使埋位，千嬅同吳家麗自動搵位遮蔭，反而吳孟達同志偉就冇咁怕曬，企埋一邊吹水，導演彭浩翔就同位臨時演員小朋友喺度玩。其實前日場戲好簡單，講吳孟達帶住千嬅兩公婆去拜山，前後都拍咗成幾個鐘，認真唔簡單。
採訪、攝影：李志明、徐錦池
五六年拍一部戲？講到嬲嬲哋，肥佬黎教王家衛拍戲！
想睇今周足本《亂噏24》？蘋果網站動Live預埋你。
http://bit.ly/appletalk24