美國職棒（MLB）早前爆出嘅新一輪禁藥風波，賽會日前決定罰13名球員停賽，當中紐約洋基三壘手阿歷士洛迪古斯（Alex Rodriguez），就因為喺事件入面嘅首腦角色，而被MLB判罰史上最長停賽場數211場！為咗過千萬美元年薪，洛迪古斯一定上訴到底！
大家未必識得邊個係阿歷士洛迪古斯，就等我求大俠介紹一吓佢先！現年38歲嘅佢，外號叫A-Rod，被譽為MLB史上最強嘅全能型球員（5-tool player，唔包括投手），無論係打擊率、擊球力量、跑壘能力、傳球能力同守備力都十分出色。佢14次入選明星賽，3次成為美聯MVP，10次得到美聯最佳擊球手。淨係聽到呢啲數字，就知道鍾意媾女星嘅A-Rod有幾勁；不過，呢啲成就𠵱家因為今次禁藥風波而蒙上陰影。
為錢上訴到底
話說今年邁阿密一間診所，有員工爆料話公司其實私底下向MLB球員賣禁藥，當中A-Rod仲要充當首腦角色，教唆相熟嘅球員一齊買禁藥！聯盟聽到又點會置之不理？除咗調查邊個球員有用禁藥之外，仲控告6名同診所有關連嘅人，告佢哋損害聯賽嘅聲譽。
MLB喺7月已經罰其中一個涉案球員：密爾沃基釀酒人嘅左外野手布恩停賽65場，而後者就決定轉做污點證人，指證其他球員。最後周一洋基作客芝加哥白襪賽前，決定罰多名球員停賽，當中A-Rod因為「長年持有及使用多種禁藥」，又「嘗試隱瞞事件及阻礙聯盟內部調查」，而被罰紀錄性嘅停賽211場！
今場係A-Rod傷癒後首場比賽，今戰得1次安打嘅A-Rod，賽前開記者會話會上訴：「我為事件感到失望，我想得到公平嘅審查。今次係我咁大個人最難受嘅時刻，加上自己38歲，真係好難頂。」因為上訴，A-Rod可繼續上陣直到上訴結果公佈。我求大俠就認為公平審查只係表面理由，真正理由都係一個錢字。因為如果A-Rod下年上唔到陣嘅話，就唔會攞到下季2,500萬美元（約1.9億港元）年薪；加上佢已經38歲，梗係會為錢抗爭到底啦！
五六年拍一部戲？講到嬲嬲哋，肥佬黎教王家衛拍戲！
想睇今周足本《亂噏24》？蘋果網站動Live預埋你。
http://bit.ly/appletalk24