周秀娜前晚於中環出席有份投資的內衣LA MIU五周年活動，身為老闆的她未有穿內衣行騷，不過仍穿上低胸裙騷四吋事業補數。活動原先在前日下午舉行，但娜姐前一晚在北京乘的飛機因天氣惡劣延遲，最後她改乘早機趕返港，活動則改於晚上進行，娜姐苦笑說：「如果我再等就變坐長途機，嗰刻好想有個超人出現直接載我返嚟，自己又想變做超人食晒啲黑雲。」
密約赴英睇波
娜姐不知是否心急跟大家見面，出場時竟不慎仆一仆，幸好沒有趴街出醜。談到做內衣品牌老闆娘，娜姐透露投資七位數字，為何不親自行騷做生招牌，是否酬勞及地位升呢？娜姐笑說：「唔係，因為之前曬太陽，搞到膚色唔平均箒！」她又聲稱若拍戲有需要，可考慮穿內衣演出。
另外，娜姐早前冧掂在網上結緣的曼聯後衞里奧費迪南（Rio Ferdinand）入股其經理人公司，里奧早前來港踢波還跟娜姐見面傾大計，娜姐說：「佢對亞洲市場有興趣，嗰日傾好會合作，但詳情未知。」里奧想用娜姐英文名出手錶，娜姐坦言有興趣，但有待公司安排。有指里奧想請娜姐去英國睇波？娜姐笑說：「我都想去，如果係包機包食宿就好，最好係私人飛機咁就唔使delay。」里奧是否有追求之意？娜姐即否認：「人哋有老婆，我想搵個超人就真！」
採訪：溫敏芝
【動主播召喚敢你就來】
立即報名： http://anchor.nextmedia.com