林奮強在八月一日得知廉政公署公佈，調查佢嘅「賣樓事件」已經完成，決定不予起訴之後，發表聲明，已向行政長官辭職，辭去行政會議成員一職。
回想去年十月，林奮強因賣樓一事，被指「偷步」，又被指與地產代理之佣金安排，有「不正常」之嫌，於是一時之間，政客傳媒飛撲出嚟，幾乎想將林奮強「圍毆」，逼佢辭職，後來社民連人物到廉署報案，於是林奮強宣佈向行政會議告假，等候調查，但冇辭職。
好嘞，9個月後，廉署卒之調查完畢，向律政司提交報告，律政司刑事檢椌專員薛偉成與獨立資深大律師（刑事專家）皆一致認為毋須檢控林奮強。
現在事情告一段落了，廉署肯正式公佈不檢控林奮強，薛偉成認為林奮強賣樓無可疑之處，總算有交帶。以前左丁山講過，廉署調查一啲政治人物，應該盡量快捷，以免政客濫用「到廉署報案」呢件武器嚟滋擾政敵，好似湯顯明、曾蔭權咁，廉署還要調查幾耐呀。
林奮強被懷疑期間，唔肯辭職，到冇事嘞，佢就第一時間辭職，左丁山認為係啱嘅，之前辭職，可能俾人曲解為「畏罪」、「心裏有鬼」，到知道官方宣佈不檢控之後先至辭職，就係表明無意戀棧權位，只係感到雖然有心為香港服務，但因賣樓而蒙受不白之冤，實感遺憾。
曾鈺成在電台講做政治，做高官，食得鹹魚抵得渴，成為公眾政治人物，就要面對壓力。話雖如此，商界人士從政，在香港還是相對性新鮮，不比美國，官商之間有旋轉門，故此香港工商財金界人士入到政府，偶爾不小心就會領嘢。上星期左丁山與一位金融高人吃午飯，佢好坦白咁講，現在政府根本好難說服商界成功人物加入政府，商家視高官衙門為畏途，裏面咁熱，入去做乜，自討苦吃咩，傾都唔駛傾啦！搵退休政務官人員頂上呀，退休AO見到麥齊光一事，見過鬼怕黑啦，容乜易被翻舊賬，長俸都冇埋？當打AO（50歲左右）呢？咪搞阿姐嘞，打份工好過。梁政府現在難以搵到能人幫手，陳茂波唯有繼續捱落去。