何韻詩將會喺10月喺紅館舉行個場，加場後共開三場。之前見過阿詩嘅主題海報女性化打扮露事業線，噚日佢喺尖沙嘴開記者會，更加出人意表咁着短裙高踭鞋上台，透視上衫又露出bra帶，阿詩仲應要求擺出嬌俏動作。話自己豁出去嘅阿詩，身材明顯比平時有睇頭，佢話：「平時都差唔多，係今日做咗啲措施。」至於係咪預告喺個騷入面會性感演出，佢話：「係比較慳布，但點都要用汽水蓋遮住，自己會放膽啲，多方面嘗試，唔會有底線。」
嫌胸大阻碇
以往為師傅梅艷芳造歌衫嘅劉培基，會為阿詩快歌部份嘅歌衫做設計，已經預告會性感。問到會否事前健胸，佢話：「夠用啦！想睇吓點縮細啲，好阻礙。」
另外，阿詩話出場位會比較特別，會有劇情。嘉賓方面，佢就話對方係自己密友，問到係咪緋聞情人鄧九雲，佢回應：「留番啲驚喜啦，到時就知。」至於問到會唔會邀請容祖兒嚟睇騷，佢就即時走人，仲邊行邊講：「我乜都聽唔到。」
撰文：馮仁昭
【動主播召喚敢你就來】
立即報名： http://anchor.nextmedia.com