內地逐步放寬一孩政策嘅機會大增，美銀美林講到一孩政策可以令內地增加950萬個BB，事實上佢都係斷估嘅箒。
究竟呢「950萬」個BB嘅誕生，對於BB用品產銷商有幾多正面影響，照計可以相當大。雖然內地唔少農村已經可以生超過一個BB，但係大城市係較嚴格。因此𠵱家大城市充斥好多獨生子女，咁啱𠵱家結完婚就開始想要BB，以中國人傳統鍾意多仔女嘅諗法，相信放寬「雙獨二胎」甚至「單獨二胎」後，都會產生更多BB，條數仲要比起外資大行預測更澎湃。
合生元質素稍佔優
至於香港上市嘅BB概念股，原來有接近一半已經變咗問題股，復牌無期，包括博士蛙（1698）、大慶乳業（1007）同澳優（1717），至於雅士利（1230）未知會唔會俾蒙牛（2319）買起咗之後消失，剩番就只有合生元（1112）、好孩子（1086）、青蛙王子（1259）同隆成（1225）。
不過，以中國國情，真正靚仔嘅BB概念股實在少有嚟香港上市，至於尚在人間嘅幾隻買唔買得落手，要自己判斷啦。其中，青蛙王子嚟自福建呢個出名多篤數企業嘅省份，聽到出生地自然有所戒備，加上間公司曾經有過銷售額出現水份嘅傳聞。雖然股價接近破頂，但市盈率19倍，市賬率4倍，要考慮佢究竟係咪壞蛋都應該打個折扣，安全起見，長揸未必考慮。
另外，就有OEM做BB車嘅好孩子同隆成，兩隻股業績其實都麻麻哋，各位亦要考慮BB車呢樣東西係可以阿哥傳畀阿妹，或者家姐傳畀細佬，所以如果屋企有位擺，或者有朋友讓出嚟，生一胎同生兩胎，都可能用同一架BB車就夠。
再者，生產BB車亦要講原材料成本，利潤率會較波動。咁嘅情況下，好孩子要賣19倍市盈率、1.9倍市賬率，其實都唔講得上好吸引。
至於隆成，執行能力可能更麻麻，做咗咁多年，中國業務比重都係得單位數字，相信有佢嘅問題，但估值平，市賬率0.56倍，所以小注都諗得過。
剩番得合生元，佢主要從事假洋奶業務，即係由外國運奶粉番大陸，然後包裝以自家品牌形式出售。
合生元最大缺點係國策唔多歡迎海外奶粉，最近要靠減價去擺平中央調查，之前佢就講到個別產品要減價5%至10%。佢銷量增加，照計可以抵銷到利潤率下跌因素，或者捱一年低增長，但之後又唔敢寫包單阿爺查佢一次就收貨，價格都總有進一步下調嘅可能性。
合生元現時市盈率28倍，相信已經反映部份政策風險，可接受但又唔算抵買。
呢幾隻BB股要晉佳揀，暫時以合生元較為秤先，至於仲有冇其他受惠股，等時機成熟再同大家分享。
晉佳
小啟：晉佳暫代王昇一天
五六年拍一部戲？講到嬲嬲哋，肥佬黎教王家衛拍戲！
想睇今周足本《亂噏24》？蘋果網站動Live預埋你。
http://bit.ly/appletalk24