【創業特寫】
想創業夢成真，取決於有沒有豁出去的勇氣。五個80後，飯盒生意搞唔成轉做客貨車界新星；牛津MBA唔做投行工，賣樓轉搞發明；打造出大熱資訊平台的主角，設計靈感竟源於生活太無聊；中大博士生在散戶市場中，找到揀股程式另類出路。創業機會擺在眼前，成敗仍屬未知之數，但四個故事的主角亦同樣決心，將機會變成屬於自己的一盤生意。
記者：倪敏慧 攝影：司徒世華 程志遠
現年36歲的梁浩輝（Kevin），擁牛津工商管理碩士學位，已婚並育有3歲女兒。仔細老婆嫩，但他決定由零開始，踏出創業的第一步。「如果連自己都唔信，仲有邊個人敢信你。」憑此份自信，他辭工、賣樓轉行做「發明家」。換轉是你，又有沒有他這份勇氣？
手機遙控影相面世
「我冇鋪後路，有時鋪咗，你反而唔會去得咁盡。」Kevin去年破釜沉舟，辭去內地投行工作，盡沽股票，賣走荃灣物業，花近百萬元成立「目酷實驗室」（muku labs）瞓身一博，花九個月時間研發，終於成功令頭炮產品，智能手機相機遙控器Shuttr面世。
當不少有志創業人士，藉口本錢不足打退堂鼓。Kevin卻充分利用新穎的渠道，全球最大民間網上集資平台Kickstarter融資，更借機為產品宣傳，兼測試市場。
Shuttr自上月10日上架至今，外界反應正面，至今已籌得約54萬元資金，更成功惹來多個知名科技網站注意，經TechCrunch及Mashable報道後，全球已有十多間公司，包括世界知名手機廠商，主動就代理或入股上門接洽。
Kevin於2010年入投行做banker，目的乃為創業鋪路。「我知我喺內地缺人脈，所以先去大陸做投行。」即使揀銀行，他亦「寧細不大」，因只有中小型銀行才有機會接觸更多小型公司，從而物色更合適夥伴。「大企業對我嚟講冇意思，唔通我同土豆個老闆講，我想創業，同我合作，冇可能啦。」
Shuttr為全球第一個，可同時適用於iOS及Android系統，免安裝藍牙遙控。「我參考蘋果的理念，簡單、不花巧……產品唔止功能優勝，仲會係一個藝術品。」他透露，首批將生產近2,000隻Shuttr，派予來自Kickstarter的投資者。
Shuttr已於內地擁有專利，然而Kevin深知，要公司繼續生存，絕非單靠專利保護。「真正的防禦工具，係要追求產品質素，同不斷推陳出新……就算冇人抄你，兩年後你嘅產品都已經冇人鍾意。」Kevin表示，已準備好未來兩年產品計劃清單，現已就更多項目進行研發，包括手機醫療器材。
首張定單重要過搵錢
花盡時間、金錢、心血，到底Kevin最終以賺幾多為目標？「我以前喺投行做財務顧問，幫人寫好多business plan，我知呢個問題講嚟都多餘。」他強調，憑他於投行的經驗學到，創業的目標，不應訂於搵幾多錢，而在於何時獲第一張定單。
【譚偉豪：勿被廠家牽制】
前立法會議員、「快譯通」創辦人譚偉豪認為Kevin成功於Kickstarter集資，是一個好開始。對於不少廠戶上門要求入股muku labs或代理，譚偉豪提醒Kevin必先首先制定商業模式，切忌急於一時，否則容易被廠戶牽着鼻子走。
五六年拍一部戲？講到嬲嬲哋，肥佬黎教王家衛拍戲！
想睇今周足本《亂噏24》？蘋果網站動Live預埋你。
http://bit.ly/appletalk24