世界游泳錦標賽不經不覺都進入尾聲，一班泳手越游越有力，當中雙膝手術後，復出冇耐嘅巴西泳手施奴菲荷，上周六仲喺男子50米自由泳決賽，以21秒32嘅成績奪得金牌，連續3屆都喺呢個項目奪冠。俾人睇淡嘅施奴菲荷，贏咗之後興奮到多次大聲歡呼！
26歲嘅施奴菲荷舊年倫奧之後，喺年底為雙膝做手術，一路休息到幾個月前先全速練水，都唔知夠唔夠狀態。不過，施奴菲荷今次決賽爆大冷奪金之外，仲有俄羅斯21歲小將莫路梳夫，同千里達30歲老將保維爾分別得銀、銅牌。而兩位大熱艾安恩同文拿度，就只係得第4同第5，真係估佢唔到。
陸瀅50米蝶破亞績
贏咗之後，早前已經奪得50米蝶泳冠軍嘅施奴菲荷，高興到不停揮拳打水同歡呼，睇嚟佢自己都冇諗過自己會贏到。呢位巴西飛魚喺頒獎儀式都一度眼濕濕，賽後仲話今次決賽係一次自我救贖：「我都懷疑自己得唔得，有冇能力比賽。可以奪得金牌實在太好，呢場除咗係我生涯最佳一仗之外，仲係一種自我救贖。上年所有唔開心嘅事，都可以拋諸腦後。」
上周六簡直係破紀錄日，中國「變幻球」泳手陸瀅，喺女子50米蝶泳以破亞洲紀錄25秒42嘅成績奪得銀牌。而美國小將列迪姬，就喺女子800米自由泳中，以8分13秒86奪金，仲破埋世界紀錄；至於列迪姬嘅美國隊友法蘭克琳亦繼續勇銳，喺女子200米背泳以破大會紀錄嘅2分04秒76奪標，奪得個人今屆賽事第5金，平咗女泳手喺一屆賽事奪得最多金牌嘅紀錄。另外，立陶宛泳手美露迪就喺50米蛙泳準決賽，游出29秒48刷新世界紀錄。
【動主播召喚 敢你就來】
立即報名： http://anchor.nextmedia.com