為曾經遭受挫折嘅露宿者、病態賭徒等失意人重建信心嘅「無家者世界盃」已踏入第11屆，呢排做咗影子特首嘅食物及衞生局局長高永文噚日去咗授旗禮，但係就冇落場踢波，高醫生自嘲自己係香雞腳，細個剩係踢膠波，所以等其他人嚟獻技。高醫生話，喺人生低潮最好就係做運動，佢當年沙士襲港跌落人生低谷，咁佢做乜嘢運動重新振作呢？答案就係「步行」喇。
8港男踢「世界盃」
今年有8位代表香港去波蘭出征無家者世界盃嘅猛男，分別係戒毒、戒賭、更生人士，年齡由20幾歲到40幾歲，喺160人中脫穎而出。比賽日期由今個月10日至18日，立法會議員兼社民連主席長毛梁國雄，都會好似上年咁隨隊為香港隊打氣。長毛噚日都有落場踢邀請賽，雖然佢早前絕食，但係體力似乎一樣咁勁。
【動主播召喚 敢你就來】
立即報名： http://anchor.nextmedia.com