近年橫掃國際攝影獎項的Gary，2005年開始才從DC仔轉用單反，「認真」影相大約7年多，但卻攞了全球大小150個攝影獎項！實際觀察，攝影器材好普通！他說重點是捕捉時機，所以相機配置一定要夠快！
記者：韓繼聰 攝影：蔡家輝
東方色彩 冧鬼佬
比賽同考試一樣要中Point：「重點是選材！國際性攝影獎項的評審多為外國人，靚山靚水睇得太多；因為參賽作品數量太多，題材要特別，要有衝擊力、感染力，才能給評審們深刻印象。」符合這些條件的，影人物便最適合不過：「東方色彩！也是吸引外國評審的重要因素，少見嘛！」
所以Gary一年五、六次出國旅行影相，都是集中在亞洲，特別是較窮困的內陸山區、東南亞等地，以拍攝更富東方人文色彩的相片；就如他最新鮮熱辣得到的National Geographic Traveler Photo Contest Merit Award的作品，便是在台中一個地方節慶上拍攝人民表演前認真化妝的情況，色彩豐富特別，感受到當地風情。
溝通加道具 影出真情
Gary另一項絕技是「溝通」，Gary明言世界無咁多有人、有景、有Mood、有表情的Magic Moment，所以佢坦言有唔少人物作品，都是經過溝通後，叫人擺Pose影的：「有次去影小喇嘛，我就同佢哋玩了很久，言語不通，我便扮鬼臉，甚至扮跌倒，引他們笑，唔係你估咁易影到幾個小朋友一齊笑呀？好難㗎！」
簡單攝具 鍛煉預視力
Gary用的都不是名機名鏡，當年一部Canon 350D加Kit鏡，今日一部Sony a99、Zeiss 16-35mm、Zeiss 24-70mm加多支Sony 70-400mm，就係咁多，攞獎無停過！Gary說機最緊要夠快，Zoom鏡夠方便，機動性高，雖不及定焦質素，但「經典的偶遇絕不可再」，唔使換鏡慳來的時間卻往往影得更多。他亦提到攝影師要多觀察，鍛煉預視洞察力，就如早前他影拳賽：「留意拳手的小動作，便可以更準確捕捉出拳的剎那！」
即時示範：屏山文物徑試影
訪問當日，小記便和Gary即場到元朗的屏山文物徑試影幾張，實際過我兩招，雖然地方不大，又無乜人，但Gary花了少少時間，也影出味道。
攝影小秘訣
寧JPEG莫要RAW
好多大師或自以為大師都愛拍RAW，方便日後執相及保留原始影像檔：「用RAW做後期係好，但影像儲存需時，影JPEG反而夠快，可捕捉更多剎那光影。」特別是一些運動或節慶，如早前攞獎的《印尼賽牛》和內蒙《賽駱駝》：「佢哋跑過咗就無，連拍夠快就係希望總有張『中』，唔通叫人哋再跑過咩。」
活用ISO Auto
另一招就是用「ISO Auto」，「只要Set好你想要的ISO範圍，便可有更多空間調校不同光圈快門，Over相機會減ISO，Under又會自動推高ISO，便可以更專注構圖及捕捉動態神情。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange