伯老未定退市時間表，美股強到無倫，阿爺又頻推行業扶持政策，港股呢兩日可謂處於蜜月期，內房、基建、資源、科網等板塊遍地開花，形勢似乎相當好。不過魏力認為，恒指連升六周後要唞唞，重磅藍籌或趁業績好消息出貨，但指數急跌可能性不大。另外，近日二三線股走勢，甚有去年9月初的味道，各板塊（尤其績優股）單季可爆升五成以上，戰友絕對要好好把握。
國務院研究促進信息消費，即包括寬帶中國、智慧城市、電子商務及信息安全四大範疇。騰訊（700）率先創新高，金山軟件（3888）上周五亦破頂，魏力相信極可能是春江鴨入場炒業績。
彭博綜合預測，金山軟件上季每股盈利為11分，按年增長57%，足以發盈喜；今年預測PE為23.8倍，較騰訊（32倍PE）折讓26%。以28倍PE為目標，可見18蚊！
想吼中小型軟件股，可吼金蝶國際（268）。集團主攻企業管理軟件及提供雲端服務，連續九年高踞中小企市佔率首位，實力毋庸置疑。受經濟放緩拖累，去年上半年蝕2.1億人仔，但下半年已轉賺7,000萬人仔，今年上半年盈喜應無懸念。
保守以今年賺2億銀計，預測PE僅22倍，配合恢復派息及潛在併購等因素，現價仍然吸引，可望藉科網股熱炒之際，一舉突破52周高位1.83元，中線更可上望2.5元。
魏力
http://www.facebook.com/2012jason
五六年拍一部戲？講到嬲嬲哋，肥佬黎教王家衛拍戲！
想睇今周足本《亂噏24》？蘋果網站動Live預埋你。
http://bit.ly/appletalk24