七月十四日左丁山在曼谷四季酒店，見到有好多保鑣站在大堂，以為有政治大人物駕到，或中東油王住在總統套房，後來見到有不少穿着紅衣AEON球衣之年青人擠在酒店外，先醒悟到係曼聯訪問曼谷，球員住在四季。後來果然見到傑斯、卡域克等人走出走廊，一位外籍小球迷撲埋去要同傑斯影相，左丁山手快快用iPhone同佢影咗一張，正想企埋去搵他人代影一張之際，傑斯已急急腳行開，左丁山大嘆走寶，呢位球員幾近四十，仍然踢得英超，在場上常有佳作，其專業精神及體能，實在令人佩服，係敬業與樂業之典範。
兩個星期後曼聯又到訪香港，香港原來有咁多曼聯fans，紅魔招牌響噹噹，可惜嘅係，香港大球場草地好唔掂，爛如薯仔田，場內有雜物，經外電報導，熱刺領隊保亞斯大力抨擊之後，香港大球場草皮貽笑國際，香港盛事變瘀事，慘矣哉。梁振英親自到大球場踩場，責成民政事務局及康文署做好工作，搞好草皮，得唔得呢？
香港有一位真正樹木草皮專家，名叫李賢祉博士（新亞生物66），係衞斯理倪匡嘅大舅仔。李博士數十年來研究植物，退休前係馬會跑道經理，花名係鋪草皮博士，又做過新加坡馬會之鋪草皮顧問，學有專長，實際工作經驗豐富，偏偏康文署常常當佢冇到！
李博士話康文署內無草皮專家，冇人識鋪草，管理又hea又曳，由康文署管香港球場草皮彎梗，一定唔掂。康文署助理署長陳若靄賴落雨太多（100毫米）及賽事太密（六日踢五場），害親大球場草皮，李博士話如此藉口幾荒謬，如果球場用純沙鋪中層，利於疏水，每小時可疏散220毫米雨量。佢又話香港有一個球場，一個月踢70場波，草地仍然正常到極。左丁山睇「南華早報」報導，藍田晒草灣球場，草地好靚，而同一日，大球場如沙泥爛地，將軍澳球場已經甩草見沙泥。晒草灣球場以前係垃圾堆填區，由環保署改造成為遊樂場區，建造了一個草地足球場，一年有好多好多足球賽事舉行，點解晒草灣草地無恙呢？記者指出：（一）球場草地有李博士做顧問俾意見；（二）球場由私人機構管理，與康文署管大球場和將軍澳球場完全不同。康文署係時候改革咯！