幾個月前，愛字堆幾個成員去真普聯論壇踩場搞到腰斬，當時大嗌一句「好嘢！收工！」嘅陳廣文一夜成名。佢噚日都有去「聲討」林慧思老師嘅活動，配合左派團體及媒體連日來嘅「文攻武鬥」，但佢噚日「收工」前就自爆，正式同「愛港之聲」分手，尋求個人發展呢個咁震撼嘅消息。
早前被淨心指挑撥離間
加入愛港之聲大半年嘅陳廣文同八方講，佢上星期五正式脫離愛港之聲，事緣佢覺得自己都係鍾意搞啲小型活動，所以成日搞「大型活動」嘅愛港之聲唔太啱自己，咁咪大家分開吓囉。佢強調同愛港之聲理念一致，只係自己以後用個人身份搞活動。佢日後會用真名「傅振中」，因為既然個名早已被起底，所以繼續用陳廣文呢個假名都冇謂喎。佢仲話自己真名叫振中，係老竇想佢「振興中華」。
愛港之聲主席高達斌話，今次大家係和平分手，但問佢有冇挽留陳廣文，佢就只答「各自發展」。其實成件事都好迷離，陳廣文早前被淨心BB指挑撥離間，𠵱家又自立門戶，背後隱藏玄機。點都好，八方希望呢班自稱愛國愛港嘅嘅組織抑或社團，都做番有公民責任嘅人，佢哋噚日搞完個聲討林老師大會後，留下一地示威牌，同每年7.1遊行、六四燭光集會相比，公民質素高下立見。
mailto:[email protected]
五六年拍一部戲？講到嬲嬲哋，肥佬黎教王家衛拍戲！
想睇今周足本《亂噏24》？蘋果網站動Live預埋你。
http://bit.ly/appletalk24