講開中國證監會，新任中證監主席肖鋼3月中上任以來，一直冇乜嘢聲氣，正當大家以為佢鍾意玩低調，原來佢只係熱身。閉關一輪，佢喺過去半個月又出席活動，又先後喺《人民日報》同《求是》雜誌撰文，訊息好簡單，就係將會加強執法同監管。
市場一直認為，肖鋼跟上任中證監主席郭樹清嘅風格截然不同，郭樹清上任17個月，大刀闊斧推行一系列措施，有人甚至話佢係「七日一新政」，肖鋼就相對低調、平實。
舉例講吖，每年一度嘅上海陸家嘴金融論壇早排舉行，佢都冇現身，往年中證監主席通常會到。
最令人驚訝，係肖鋼上月中出席全國小微企業金融服務經驗交流電視電話會議，竟然一頭白髮示人。睇嚟佢係閉關諗政策路向，先至唔得閒染髮。內地傳媒對於佢打算加強監管亦相當受落，形容佢係「傳遞監管轉型好聲音」。
【動主播召喚 敢你就來】
立即報名： http://anchor.nextmedia.com