【Kobe in HK】拜恩昨日旋風訪港，風頭媲美剛離港的英超球星，除吸引數百球迷朝早9時逼爆波鞋街外，更令私家車司機因睇熱鬧而撞車。球迷為睇Kobe而擠滿修頓，連拳王曹星如也變身小球迷。Kobe由朝玩到晚，除即興上山頂、夜訪花墟球場外，更承諾不會再讓香港fans等足4年。 記者：徐嘉華、鄧永賢、林湛穎、李榮康 攝影：黃賢創
「我希望下次來香港時，不用再讓球迷等足4年。」Kobe對上一次來港，已經是09年，他昨日大讚「香港美麗」可不是空口講白話，來港不足24小時的他，出席完旺角Nike店新開張後，還即興乘坐渡海小輪，到中環後轉坐纜車遊山頂，再到修頓與香港球迷會面，晚上又踩落花墟（左圖）。
逼爆旺角引發車禍
Kobe昨晨約10時45分抵達下榻的半島酒店，第1站先到旺角波鞋街為Nike新舖造勢，原定個半小時活動，Kobe遲了1小時到場，但旺角新店前的一條街已企滿球迷，有香港的亦有來自國內的；有內地球迷坦言睇準香港秩序較內地好，人流又較少，所以寧花數千元來港追星。拜恩到場前發生小插曲，當時街上球迷又舉牌又舉波衫，路邊亦有警察及保安維持秩序，突然出現一下剎車聲，原來是對面街的小巴被尾隨的私家車撞到車尾，在場警員即時上前處理。
Kobe在2時半到場後，不忘與球迷握手，到舖內第一時間與拳王曹星如合照，還學星如握拳，變了小球迷的星如表示：「我冇想過Kobe會跟我一齊握拳拍照，見他現場如此多球迷，我希望自己有一天的拳迷也和他一樣多。」Kobe臨走前不忘冧fans，將3個簽名籃球擲給球迷，令波鞋街歡呼聲不絶。
離港前踩落花墟
拜恩之後轉戰港島，在修頓頒發Nike League的獎項，在球迷「Kobe MVP」之聲不絕於耳下出場的Kobe，被Nike League各組別MVP問到身高及受傷問題時，他也笑着回答。其中最搶鏡是女將鄺曉琳問到，如何在高大的NBA球員面前做到出色表現時，Kobe說：「身材不高的話，就靠速度及技術，像你（指曉琳），你或者有機會過我也說不定。」
Kobe約逗留半小時，在尾段將簽名籃球拋向觀眾席，坐輪椅的12歲小孩張家棟更獲他親自贈波兼合照。Kobe晚上更即興要求到花墟球場亮相，吸引近百名球迷圍觀，而Kobe更主動相擁球迷，high爆全場；他今日已轉往深圳，繼續籃球之旅第2站。
街訪
五六年拍一部戲？講到嬲嬲哋，肥佬黎教王家衛拍戲！
想睇今周足本《亂噏24》？蘋果網站動Live預埋你。
http://bit.ly/appletalk24