每次搭地鐵去大球場都有這個疑問，究竟喺天后出近還是銅鑼灣近呢？當左腦嘗試計算實際距離時，右腦就會殺出銅鑼灣的熱鬧繽紛場景，腳步自然就會朝紫色月台落車。
當大球場係自己屋企
落了車永遠又有第二個疑問，咩閘口出呢又，通常諗得3、5秒之後就會湧現丹麥餅店的畫面；對，它不是出口，它卻永遠是我去大球場的起點，一來球場內的人龍太可怕，二來在大球場附近的親切感，真的買少見少。
拿着味道20年如一日的熱狗和漢堡包上球場，原本已經很長的路還要來個警方安排的繞道而行，做球迷也確實要有強勁的大髀，要睇英超球星，就要出錢和出力。
大球場就是如此一個沒有歸屬感的地方，一邊避雨，一邊上山的我看見旁邊興高采烈的fans，其實有點自責點解如此不投入，「自己屋企自己主場嚟㗎衰仔！」係咩？咁我認我係不孝囉，自言自語時終於入了場朝聖，一睇見個泥地時，突然之間我彷彿大徹大悟悲從中來：原來我不嬲都當大球場係自己屋企，因為這一刻我感到好慚愧，好冇面，就好似有客人去到你屋企，而你竟然成屋亂糟糟仲要着住件睡衣㖭，我遙遙睇見英超人士的愁容，嗰一刻真係想落手落腳打掃下屋企塊田先。
唔好怪巴利
喺球場擾攘一輪之後，我喺同柏加嘅合照入面攞番啲安慰，亦借住同迪肯尼奧嘅對話攞番啲歸屬感，而當球迷們都抱住既來之則安之的心情高唱雨中Sha la la時，我見到全場最想走人𠴱位朋友，就算南華成隊蟻嬲蜜糖咁黐住佢都係苦瓜乾咁樣，大家真係唔好怪加里夫巴利，後生仔個個都想衝上雲霄，念舊永遠都係喺發展之後。
離開大球場的路線係好似短一點，儘管心情並冇輕鬆了一些。
KEYMAN
now TV主持
【動主播召喚 敢你就來】
立即報名： http://anchor.nextmedia.com