巴塞隆拿喺周五舉行嘅甘柏盃熱身賽嚟料，由美斯喺開賽8分鐘揭開大炒嘅序幕，主場贈巴甲球隊山度士8隻光蛋。球迷最期待嘅，自然係啱啱今年夏天由敵軍過檔嘅尼馬，佢就下半場上陣倒戈，首次畀魯營班球迷一睹佢同美斯嘅M&N（Messi & Neymar）組合，畀球迷過吓癮。
尼馬入替後表現唔錯，喺68分鐘仲喺左路橫傳畀法比加斯入波，雖然有助攻，但佢嘅巴塞第一球就仲要再等吓。比賽期間仲有段小插曲，一名件衫印咗山度士死敵國際體育會會徽嘅球迷衝入球場怒罵尼馬，最後被保安帶走。
新帥拍心口法比仔唔走
法比加斯亦都係今場波嘅焦點所在，皆因他最近受到曼聯咬住唔放不斷斟介，但佢心情似乎都冇受影響，後備上陣入兩球，表現咁弗，新帥馬天奴賽後即再向紅魔派檸檬，話好有信心法比仔一定留隊：「我想法比仔留隊，甚至夠膽講佢一定唔會走。唔好以為我過份自信，只係我嘅願望一定會實現，當然有啲嘢都要由佢自己做最後決定。」呢句多少令曼聯覺得仲有一線希望嘅。
另外，今場巴塞件波衫用啲字體好特別，係出自一名28歲、患有唐氏綜合症嘅女藝術家手筆，賽後會擺上ebay拍賣，目的為幫助有學習障礙嘅兒童作慈善籌款。
五六年拍一部戲？講到嬲嬲哋，肥佬黎教王家衛拍戲！
想睇今周足本《亂噏24》？蘋果網站動Live預埋你。
http://bit.ly/appletalk24