【中環置地】現年58歲嘅大美人林青霞唔只後生靚，難得到今時今日，仍然保養得咁好，兼且儀態萬千。而佢對同邢李㷧生嘅兩位寶貝女邢愛林同邢言愛，都好有母親嘅風範，當中今年17歲、亭亭玉立嘅愛林同同父異母嘅大家姐嘉倩有幾分相似，都係以氣質取勝。
前日下晝5點鐘，青霞同愛林喺中環出現，青霞以一身全黑打扮，配上墨鏡同閃鑽頸鏈，雖然息影多年，不過佢依然散發一股星味加貴氣，令人一眼就認得出。至於愛林就以時下年輕人嘅打扮出現，青春逼人！佢哋兩母女十指緊扣，由娛樂行方向行咗去置地文華東方酒店準備上車離開，不過由於當時正值放工時間，中環交通非常繁忙，等極都未見架車嚟，愛林發現有記者喺度影相，即刻通知媽咪，不過青霞都係笑一笑就算。
入店暫避風頭
不過，等多一陣聞風而至嘅記者越嚟越多，青霞最後同囡囡入咗就近嘅Harvey Nichols度等，大概5分鐘後佢哋架車卒之駛到，兩母女終於有車坐。青霞全程保持微笑，未試過有一刻因為太多記者影相而面黑，呢啲絕對係班娛樂圈新人嘅最佳榜樣。
採訪、攝影：楊浩賢、吳耀輝
五六年拍一部戲？講到嬲嬲哋，肥佬黎教王家衛拍戲！
想睇今周足本《亂噏24》？蘋果網站動Live預埋你。
http://bit.ly/appletalk24