【隔牆對論】
記：《蘋果》記者
杜：下白泥村村民杜錫譽
記：堆填區在居所附近，對居住環境有多大影響？
杜：臭味、泥塵、噪音好直接影響我哋，每日8點開始收垃圾，到夜晚8點停收，跟住開始做平整工程，佢噪音限制攞到11點半，有啲大時大節垃圾量多，佢會做到凌晨兩、三點，泥塵呢幾年幾嚴重，堆填區講緊90幾公頃，只係得兩部灑水車。
臭味就唔使講，離我屋企百零米，等如有個大垃圾站喺身邊，仲要講緊長期。老人家臭到頂唔順就搽萬金油蓋過陣味，佢啲垃圾味好酸餿，有昂船洲渠泥、豬糞啦，垃圾底層分解出嚟臭蛋味，聞得多個人會頭痛頭暈。晾衫出嚟又會索晒垃圾味，垃圾味入咗屋好耐都散唔到，最嚴重係食飯，（鄉村）通常去戶外露天有蓋地方食飯，一聞到陣味就唔會好受，完全冇晒食慾。
記：有人批評居民拒絕擴建是自私，你覺得承擔整個香港的廢物是否公平？
杜：呢樣嘢擺去邊人哋都係覺得唔公平，我覺得你既然要擺喺到，希望處理好一啲，減至最低影響，咁就對我哋合理少少。起碼我喺度住，同香港市民去捱呢樣嘢。你攞你屋企垃圾擺去我屋企，都唔該你包裝好，搵方法整到佢唔臭。
但我投訴佢哋噪音、臭味，佢就整屏障，10呎8呎高屏障（實為7米）可以做到啲乜嘢？我諗幼稚園學生都知做唔到啦，佢話完全改善到問題，我覺得你做錯咗唔認，仲要不斷話自己冇問題，厚顏無恥囉。
記：你反對擴建堆填區，對興建焚化爐有何看法？
杜：我覺得焚化係一定需要，堆填區垃圾唔係堆咗就算，會滲漏不斷揮發，如果焚化燒咗就一了百了。好簡單講句，等如火葬同土葬，點解香港市民接受火葬，唔接受去焚化呢？你土葬（堆填）根本係唔夠地方，亦係唔衞生。
由邱騰華、曾蔭權做路演，去到日本研究焚化爐講到幾高技術，點解你唔做個縮細模型，真真正正焚燒垃圾，去香港咁多個商場巡迴展覽，你真係畀到個數據學者認同，數據係得嘅咪推囉。
記：如何評價源頭減廢成效？
杜：佢話有一籃子措施做源頭減廢，堆填量就少好多，點解𠵱家唔即刻做？現有堆填區壽命會長好多，你講就去做，唔應該死拖爛拖，一陣又話開乜嘢委員會，跟住就冇咗件事。
垃圾徵費真係要，始終針唔拮到肉唔知痛，等如當年出一個垃圾膠袋徵費，𠵱家好少見到百佳膠袋周圍飄，事實上好咗好多。當然樣樣嘢都應該政府行頭，爭在咁弱勢嘅政府敢唔敢開始做呢樣嘢。
記：對黃錦星表現滿意嗎？
杜：其實黃錦星都係新上任，佢都係受害。如果要問責，要搵番邱騰華出嚟，廢物政策唔係一時可以處理到，其實喺10年8年前處理到就唔會有今日局面。黃錦星第一次喺將軍澳撤回（擴建）方案其實做得好錯，原本我哋打定輸數唔會搞爭取，但見到黃錦星主動棄權，原來民意可以令官腳軟，我哋嘗試去做嘢。邱騰華同曾蔭權坐過直升機嚟堆填區，亦喺嗰段時間做好多擴建堆填區動作，若果喺邱騰華嗰個年代擴建堆填區，我相信係過咗。
記：政府堅持擴建堆填區，會否接受補償方案？
杜：我哋唔想畀香港市民誤會，要求有乜嘢先畀堆填區擴建，或者我哋根本冇能力決定個堆填區擴唔擴建，總之我哋誓保家園。政府完全冇當我哋係人，我哋忍受唔代表接受，我哋要攞番尊嚴，我哋都係香港居民有交稅。你政府用錢利誘我哋，講到我哋好市儈，畀多啲錢就得。咁係將我哋強姦完再吐口水。
mailto:[email protected]
【動主播召喚敢你就來】
立即報名： http://anchor.nextmedia.com