近年興深潛，靚影海底奇兵，仲有勁飄逸嘅婚紗相！但有無諗過，呢套重達十幾磅裝備，就算換上民用級器材，拎住喺手始終都唔係太方便！美國品牌Liquid Image，潮玩潛鏡聯乘相機功能，裝埋800萬像素「天眼」，可以第一身角度拍攝水底環境，甚至捕捉靚人靚魚美態，蹺埋雙手，坐定定睇戲，爽！
記者：陳國輝
攝影：潘志恆、許有達
模特兒：Kiko@Unique Model
兩粒掣配紅藍燈 輕鬆拍
睇見巨型潛水鏡Liquid Image 304，咪以為一定好專業！佢實情為入門級潛水人士打造，設計好簡單，前額係800萬像素鏡頭，全機只得兩粒掣，一為影相或拍片切換，二係快門或攝錄開關；可能你會諗，戴住個Mask乜都睇唔到，點知自己有無㩒錯？潛鏡內側裝咗一盞LED燈，當你使用相機，會見到係紅色，切換為攝錄機，佢就變成藍色，錄影時仲會不停閃爍，完全知道發生緊乜事！
可能你又覺得，既然係入門級，防水性能有限吧？潛落5米水深，勉強在會所泳池，海灘附近玩吓無妨！值得一讚，係佢設計好認真，例如頂部插卡位、USB槽以至底部電池位，已提供防水膠塞，另加個蓋擰實，具雙重保險；同時，放入兩粒AAA電池，即可錄製2.5小時影片或拍攝2,000張相片，豪玩半日肯定無問題！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange