羽毛球「1哥」李宗偉同十幾位大馬國家隊隊員，為備戰下周一喺廣州展開嘅世錦賽，全隊特別到沙田體院集訓個幾星期。4月榮升老竇嘅宗偉，可能掛住留喺大馬嘅囝囝嘉謙，噚日同港隊一齊拍跳練習嗰陣，一見到港女隊教練王晨個1歲大囝囝鄭星駿，即刻又攬又錫，父性大發。
宗偉同太太黃妙珠舊年11月結婚，今年4月一索得男，生咗囝囝。宗偉既要應付比賽，又要照顧老婆同囝囝，難得佢仲可以笑笑口話，「生活同以前冇大分別。」由於香港同廣州嘅天氣好相似，而且地理位置接近，大馬隊專登喺沙田體院集訓。不過囝囝只得3個月大，唔太適宜坐飛機出國，「1哥」咁耐冇見心肝寶貝，一定心掛掛，咁啱王晨同丈夫鄭昱閩帶埋兒子星駿到場，宗偉忽然父性大發，原本佢同港將黃永棋對練緊，忽然放低球拍，抱住星駿走嚟走去，想𠱁BB開心，之後同鄭昱閩密密傾，睇怕話題都不離湊仔經。
「囝囝是比賽推動力」
30歲嘅宗偉經常喺大賽做「二奶」，舊年倫奧、08年京奧、11年世錦賽決賽都係輸畀中國嘅林丹，「升呢」做老竇後，首次參加大賽，佢都希望會轉轉運，「做咗爸爸之後，責任大咗，囝囝亦成為比賽嘅推動力，當然唔好畀自己咁大壓力，冠軍只有一個。」
列為男單頭號種籽嘅宗偉籤運唔錯，佢按照賽例喺上線，「超級丹」同國家隊另一主力諶龍都處於下線，決賽之前都唔會碰頭。佢亦都表明只要唔受傷患困擾，就會參加2016年里約熱內盧奧運，希望為大馬贏得史上第一金。
【動主播召喚 敢你就來】
立即報名： http://anchor.nextmedia.com