【本報訊】恒隆集團主席陳啟宗早前藉批評財政司司長曾俊華為「大罪人」，來替特首梁振英施政問題開脫不遂，昨日轉而批評民主派以至前特首曾蔭權是「政棍」，「專做潑婦」來「出位」，又指一人一票是導致歐美財政問題的原因，形容爭取普選的人「冇腦、崇洋」。民主派議員炮轟陳啟宗橫蠻和違反普世價值，反問「又唔見陷財政懸崖嘅國家整番個功能組別」。
記者：呂浩然
陳啟宗昨出席一活動時先為梁振英背書，意有所指地稱，自己沒有欠下政治人情債，所以一早就支持梁振英參選，反而有些人是在特首選舉前一年才「倒戈」挺唐英年，自誇「做人太精叻有時會弄巧反拙，反而最戇居嘅會執到寶」。
指曾蔭權「最多係政棍」
自覺押對「寶」的他向民主派開火，指在一人一票產生立法會議員的直選制度下，有議員發言目的是為了「出位」和打擊對手，「好多嗰啲政黨、政治人物、政棍就係專做潑婦，因為制度要你做潑婦先可以出位，你先可以成為主角，主角就變咗主流」，他連曾蔭權也不放過，「曾（蔭權）先生話佢係政治家真係可笑，最多係政棍、政客啫」。
批評民主派之餘，陳啟宗更亂指一人一票造成歐債危機、美國陷財政懸崖，因全球十大負債國家中，九個是有一人一票的民主國家，稱由於西方政制屬零和遊戲，才形成對人不對事的問題，大讚立法會直選加功能組別的制度是「最好嘅制度」。他更為早前指香港核心價值，是勤奮向上的言論辯解，指港英年代沒有民主，回歸後民主即成為核心價值，批評覺得民主是核心價值的人是「擘大雙眼講大話」，「變咗儍更更，美國佬吹笛你就跟住佢哋起舞，香港人係咪咁冇獨立思想？」
民主黨主席劉慧卿不屑陳啟宗言論，斥陳「廢話」、「唔知佢噏乜」，強調「冇人話有一人一票就會變樂土、冇晒問題，但你見唔見到人哋陷財政懸崖、要自救，會學香港咁整番個功能組別？」
劉慧卿指陳啟宗的說法並非主流意見，選舉結果證明市民認同普世價值，因支持一人一票的人取得多數票。
「佢唔明港人務實想法」
公民黨黨魁梁家傑形容陳啟宗財大氣粗，已達「橫蠻、盲目地為梁振英說話」的地步，指港人爭取具更高認受性的特首，令這特首有足夠牙力去執行政綱，是實事求是地為本港解決問題，「好明顯佢係唔明白香港人呢種務實嘅想法，佢反而覺得我哋係喺務虛、崇洋，佢對香港爭取民主嘅人極不尊重，亦都不了解民意」。
陳啟宗反民主普選言論
‧凡係話民主係香港核心價值嘅人，都係擘大雙眼講大話
‧凡係一人一票就係啱晒，百分之一百啱晒嘅，咁我只能夠話：你一係就冇腦、一係就崇洋、一係就冇道德勇氣
‧香港現有嘅制度，既有一人一票嘅成份，亦都有功能組別嘅成份，呢個係世界上現有、我睇到、我所知道嘅最好嘅制度
‧佢哋（泛民）嘅對手唔止係梁先生、唔止係香港特區政府、唔止係建制派，佢哋嘅對手亦係北京，不過唔夠膽打阿爺就打個仔咁解
【動主播召喚敢你就來】
立即報名： http://anchor.nextmedia.com