【葵涌8號碼頭】憑演「葉問」成為「宇宙最強」嘅甄子丹，因為嚟緊開拍嘅《葉問3》改由黃百鳴個仔黃子桓做導演，唔係由同子丹合作開嘅葉偉信執導，結果宇宙最強講咗唔拍《葉問3》，真係唔知點收科。不過唔做葉問，甄子丹都仲有唔少戲拍，近日佢就同內地演員王寶強拍緊《一個人的武林》，前晚佢喺葵涌8號碼頭附近封路拍攝，好大陣仗。
子丹當晚同幾十個工作人員喺現場拍攝，雖然話係宇宙最強，但當晚見子丹左面有幾條血痕，擺明話佢同人打完受傷，唔係一面倒贏晒。除咗喺路邊拍之外，現場仲將兩條馬路嘅其中一條行車線封閉嚟拍戲，雖然已經成8點幾9點，但現場仲有唔少貨櫃車出入，因為封路搞到交通擠塞，有司機唔耐煩係咁響號表示不滿，因為有咁多車，亦阻礙咗拍攝進度。
補妝最強
講番子丹，當晚見佢都係以上身出拳嘅動作為主，埋位前佢好認真同對手試位，其中一場子丹要捉住對方再向後拉，佢同對手都好搏命。不過打還打，化妝人員都不時為子丹補妝，點都要保持番宇宙最強嘅靚仔樣！
採訪：王崇穎
攝影：陳俊強
【動主播召喚敢你就來】
立即報名： http://anchor.nextmedia.com