英國佐治王子呱呱落地，港人視如己出，齊歡唱同慶賀，恨不得親口向前度事頭婆祝賀。回歸16年，不少港人心底那片藍仍舊沖刷不掉，追憶大英帝國子民身份，只怪偉大祖國令人發窘。大家念舊戀英，因為阿爺給你梁振英！
李嘉冰（Karin）移民英國近40年，回流後在中環威靈頓街開設英式茶館Shortbread，好讓大家懷緬昔日風情，這才發現，儘管港人黃皮白心，但原來大部份人對英倫餐桌禮儀一竅不通。
記者：中環特工隊
李嘉冰的茶館位於地庫，拾級而下，梯間已滲出英倫情懷，映入眼簾便是淺藍色牆身，用來鋪蓋雜物的布印滿英國旗，古典橢圓鏡掛在牆上，拉開一塊英國旗膠板，才能進入店內。店子才600呎左右，Karin與英籍丈夫Clive於開放式廚房忙東忙西，記者差點以為走進了英國人的家中。
Karin 10歲時舉家移居英國，於蘇格蘭經營中餐館，10年前父母告老回流，五年後Karin亦重歸故地。她天性反主流，於彼邦賣中餐，回港後卻轉賣蛋糕西茶，店子首先於兒時舊居大埔開業，藝人朱茵跟老公黃貫中也是客仔，但在新界賣傳統英式甜點，知音難覓。「有個阿婆問我有冇菠蘿包！有個話要咖喱牛肉飯、雲吞麵，又有個阿叔話要凍檸賓，我問番佢『乜嘢黎㗎？』」
Karin自言中文只有小學程度，對於記者的提問，偶爾也顯得一臉疑惑，遑論街坊充滿創意的問題。「有客同我講價，加呢樣轉嗰樣，多啲鮮奶多啲牛油，企枱話要加兩蚊，佢唔願畀」。
夜晚high tea嚇親人
說到底，做生意不能孤芳自賞，大埔店經營兩年後結業，「真係唔識欣賞，沖茶用嘅奶，十個客有八個要我幫佢哋整番暖，我話我哋英國人係用凍奶。熱奶同凍奶飲落去係唔同㗎，解釋咗都冇用！」相隔一年，上個月落戶中環，由於寸金尺土，店子只能躲進地庫，面積也減半。
英國人對茶的重視，不僅是味道，還講究茶具，Karin店內的茶杯，全都從英國搜羅，每套也有60、70年歷史，已經絕版，即使有售，售價也高達70鎊，折合逾800元港幣一套。英國人用匙羹往杯中心輕攪兩下，不碰杯邊，「英國啲杯好多時都係手造，如果成日用條匙羹刮，就會甩晒色。我好多時收杯返嚟，匙羹仲插喺入面，我都唔知點叫啲客唔好咁，但又驚佢哋話：『你啲杯咁巴閉嘅！』但其實真係幾巴閉！」
茶具以外，禮儀亦同樣重要，「尤其係後生嗰輩，就咁樣（用匙羹）搯嚟飲，係唔啱㗎，bad manner（冇禮貌），你玩緊你杯茶。應該捧起杯茶，個人坐直，（飲茶）唔好食麵咁𠽌𠽌聲」。吃蛋糕也大有學問，橫叉切下才是正道，但港人十居其九直插蛋榚，「我見好多少女猛咁插，插到碎晒」。
不少港人雖對港英時代念念不忘，但對英國文化一竅不通，令Karin訝異。「英國人好有規則，lunch time要食包飲湯，蛋糕留番tea（下午茶時間）。香港人想食乜就食乜，試過有兩個客夜晚8點幾嚟話要high tea，我覺得好奇怪」。若要為香港人的桌上禮儀打分，10分滿分，結果如何？「大埔人我畀三分，中環我都畀到六分」。
畢竟作客歲月，比留在主場更久，回港五年，Karin仍處於適應期，「西人好守規矩，喺英國，男士女士都好，你要入門口，人哋知你入緊，會開埋門畀你，呢度就冇，你打開門，佢就即刻閃入去！」言下之意，香港人一文不值？「我自己都係中國人，唔會歧視中國人，只係我受嘅教育同香港人唔同」。
Karin雖不自詡藍血人，但她的童年的確與眾不同，去年辭世的爺爺李炳貴在大埔地位顯赫，生前是大埔舊墟村長，亦是兩所小學的創辦人，難怪她讀小學時在學校打橫行，「嗰度我大晒，我姑姐教書，另一個姑姐係秘書，阿爺係校董，全部自己人。（老師）唔敢鬧我，好錫我」。
事隔40年重回勢力範圍難以適應，對丈夫Clive而言，來港更是犧牲，「我到街市買餸，一講廣東話，大家都會笑，所以我𠵱家都唔講喇。香港每個人都好趕，行路要趕，食嘢都趕，其實越趕就越容易犯錯」。
Clive原於蘇格蘭大型醫院任高層，但像一般英國人，焗得一手好蛋糕，十多年前於當地一個舞蹈班認識Karin，如今為愛走天涯，變成異鄉人，從前負責管理資金營運，如今每天做「阿茂」，「以前我一周工作五日，年假有41日，喺呢度我仲未放過假，都算係犧牲，但我更視為一種挑戰、改變，我鍾意改變」。後悔嗎？「仲未，可能某一日會，哈哈！」捨棄一切，全為一個愛字，「佢想返嚟，我就要嚟，我總唔可以任由佢離開，每半年先返屋企一次，何況對佢嚟講，都係新挑戰」。
中環爆料熱線
WhatsApp：9499 3777
【動主播召喚 敢你就來】
立即報名： http://anchor.nextmedia.com