超人要賣百佳，引嚟全城熱話，CY治下嘅香港，營商環境係咪真係越嚟越唔掂？超人係東亞銀行（023）主席兼行政總裁李國寶嘅「真朋友」，噚日東亞派成績表，華華梗係要請教寶哥哥，香港營商環境係咪咁差，佢間銀號使唔使重新部署，削本土投資，放多啲彈藥係神州呢？
「不嬲好有confidence」
難得喺記者會一開金口嘅寶哥哥，笑笑口咁話：「我不嬲好有confidence，多年嚟對香港都有信心，冇問題嘅……（香港）營商環境係好嘅……」
自從離開立法會之後，有市場中人就形容，寶哥哥對政治已經心如止水，除咗2月喺東亞年度業績會上，被問到政府出招係咪過度監管時，佢就篤住杯凍檸茶，暗批所有監管都係過度監管，寶哥哥就好少再月旦時事嘞。
而近年業績會，傳媒都經常追問年過七旬嘅寶哥哥，有乜嘢接班大計？偏偏噚日就冇人問。點知東亞業績會結束，東亞喺收市後出份通告，話董事會成立咗一個提名委員會，以備物色董事、行政總裁同高管人員，職權範圍有所修訂。
淡淡定繼續做CEO
就連分析員乍看，都以為當中暗藏寶哥哥準備唔做行政總裁（CEO），部署接班嘅玄機呀。了解過後，原來係美麗誤會，成立呢個委員會只係要符合公司企管準則嘅常規做法。
李華華
mailto:[email protected]
五六年拍一部戲？講到嬲嬲哋，肥佬黎教王家衛拍戲！
想睇今周足本《亂噏24》？蘋果網站動Live預埋你。
http://bit.ly/appletalk24