仲未有牌嘅香港電視話事人王維基，噚日返咗母校民生書院，不過佢唔係搞校慶同演講，而係出席香港電視新劇《四年B班》開鏡，新劇以廿幾個小學生做主角，演員就有陳宇琛（石仔）、蔣祖曼同郭峰等演老師。
「唔拍最慳」
之前有傳王維基因為發牌無期，所以要節流慳錢，噚日睇到呢套劇嘅卡士，似乎冇乜大星撐住，唔通就係為節流慳錢？明顯心情唔錯嘅王維基解釋話：「呢個係四集短劇，每集半個鐘嘅一個試驗，我哋都唔夠膽一次拍20集。大家都睇到冇熟面口嘅男一同女一（男、女主角），希望係一個清新啲、另類啲嘅選擇。」
王維基又話因為小朋友開工時數同日數都有限制，所以由原本計劃6至8集都要縮減，王維基仲話如果係因為想慳錢嘅話，唔拍就最慳㗎喇，總之目標就係畀多啲歡樂大家。
至於扮演代課老師嘅石仔就話：「我都想有更多重要角色做，自己覺得發展幾好。雖然傳有人唔續約返無綫，不過我反而認為公司做嘢氣氛好，成個大家庭咁，大家做嘢都有團火。」十足無綫「以前」咁樣喎，咁𠵱家即係點樣呢？
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！