專賺女人錢嘅莎莎國際（178）業績靚仔，近日更重鎚出擊，趕走G.O.D.，喺銅鑼灣禮頓中心開咗個兩萬呎巨舖，間舖仲喺噚日靜雞雞開張試業。聞說，莎莎老闆郭少明同老婆噚日未有親身巡舖，話要等遲啲正式開張，先至一次過帶記者朋友參觀。
呢間概念店除咗地方大之外，形式亦有別於一般嘅莎莎店舖，公司似係做埋二房東咁，舖內有創興銀行（1111）廖氏家族第三代廖偉芬開辦嘅Habitu咖啡店、AVEDA髮廊、Bobbi Brown、Anna Sui嘅專櫃，感覺似百貨公司。
咁大間舖，唔知租金貴唔貴呢？郭少明喺上次業績會就好口密，唔肯透露幾錢租，淨係話算係幾抵喎。應該話，做到生意賺到好多錢咪抵囉。
【動主播召喚敢你就來】
立即報名： http://anchor.nextmedia.com