聯儲局前晚議完息，會後聲明同上次有些少分別，目的不外乎想話畀大家聽請放心，儲局唔心急收水，會後聲明揭盅後，美股上落唔大，埋單更倒跌，除咗反映市場認為今次議息冇驚喜之外，大概亦因為投資者早段見到美國上季GDP勁過預期就大喜過望，將個市挾到創新高，隨後睇真啲至發覺原來個數都唔係咁正，紛紛高位走貨有關。
美國第二季GDP雖然有1.7%增長，比市場估計嘅1%省鏡，但主要拜首季GDP向下修訂至1.1%、令比較基數細咗所賜，況且佔整體經濟七成比重嘅個人消費，上季增幅亦由首季嘅2.3%落返去1.8%，點睇都唔可以話好好景。
儲局退市戒急用忍
禮拜三GDP數據曝光後，美元同美債走勢各異，10年期國債孳息一度大升近10個點子，去到2.7厘嘅三個禮拜高位，美元兌各主要貨幣則升咗一陣，都反映市場認為數據增加咗儲局啟動退市嘅機會。
值得留意嘅係，美股道指早段曾經一度上升超過百點並且創出新高，冇俾債息抽升抽後腿，某程度上反映儲局退市話題玩咗兩三個月後，投資者開始覺得退市並非甚麼洪水猛獸。
講返儲局議息，今次會後聲明同上次主要有三方面唔同，包括話當前經濟只係適度增長，冇之前講嘅溫和增長咁樂觀，其次係關注按揭息率上升會阻礙樓市復蘇，而最值得注意嘅係，儲局擔心通脹過低會連累經濟，綜合而言，即係話畀大家聽儲局「戒急用忍」，唔心急退市。
市場對儲局收水預期降溫，歐元喺1.32至1.33美元上落，美元兌日圓曾上返99邊，一眾主要外幣當中，澳洲紙最閉翳，兌美元跌到89.31美仙嘅三年新低，導火線係澳洲儲備銀行行長斯蒂文斯爆響口話仲有減息空間，市場覺得佢下周二減硬息，相信係議息結果揭盅前，澳元都難有起色。
環顧近期外匯市場，美元走勢主要由儲局何時退市消息主導，所以兌各主要貨幣都處上落市格局，未有明顯趨勢，美元以外嘅外匯交叉盤，反而較易捉路。
以澳元同紐元這對姊妹貨幣為例，雖然新西蘭總理John Key早幾日表明希望紐元貶值，令紐元兌美金近日落返80美仙樓下，但由於市場預期澳洲同新西蘭息口走勢背馳，新西蘭明年可能掉頭加息，紐元兌澳元交叉盤由今年3月開始上升，其升勢嘅持久度相當不俗，儼如近期某成人用品新廣告所創造嘅英雄人物，係近期匯市當中名乎其實嘅「持力奇俠」。
當然，紐元兌澳元已經由3月頭嘅0.79上升到0.88樓上，累升逾10%，高追風險唔細，但正如好多投資專家話齋，升市莫估頂，係基本因素不變情況下，有時真係會升到你唔信。
奇兵
本欄逢周五刊出
五六年拍一部戲？講到嬲嬲哋，肥佬黎教王家衛拍戲！
想睇今周足本《亂噏24》？蘋果網站動Live預埋你。
http://bit.ly/appletalk24