前日場奧迪盃相當精采，曼城半場都贏緊AC米蘭5:3，足智彩開咗個800倍嘅半場「主其他」波膽。見到咁精采，我求大俠當然捱眼瞓睇落去，點知兩隊都收夠籌，換邊後竟然冇入波！又唔可以怪兩隊臨尾收油，因為噚日仲有比賽，其中AC踢完之後仲要飛去美國。
爆800倍半場主其他
周三嘅奧迪盃4強，AC大戰曼城；AC好多主力都冇出，例如前鋒巴洛迪利，佢哋上半場條防線認真得人驚，簡直係穿晒窿！精銳盡出嘅曼城用咗36分鐘，就靠迪斯高梅開二度，加埋大衛施華、高拉洛夫同米卡李察士嘅入波，領先AC足足5:0。上半場係曼城威晒？又唔係，輸到5球後，AC突然回勇，喺6分鐘之內連入3球，包括艾沙拉維入兩球，小將彭達拿都有一球進賬，追到3:5，開出800倍嘅半場「主其他」波膽。
見到AC上半場臨尾咁勇猛，我求大俠都想睇吓佢哋追唔追得番，點知下半場戰情平淡，兩隊都再冇入波，曼城維持贏5:3完場。隔得一日，曼城周四喺決賽面對喺另一場4強贏聖保羅2:0嘅拜仁慕尼黑，而AC就同聖保羅爭季軍；難怪兩隊下半場都就住踢。
今場最開心莫過於入兩球嘅迪斯高，佢近3仗友賽入4球，包括喺巴克萊亞洲賽射入兩個致勝波，狀態大勇，正好向新帥比歷連尼證明自己嘅實力，順便向祖維迪同尼格度兩名新加盟嘅鋒將「宣示主權」，領隊比歷連尼就話：「我早決定咗迪斯高喺隊中嘅位置，佢係頂級射手，係我哋嘅正選。」迪斯高亦好識賣口乖，大讚比帥領導有方：「同過去比較，我𠵱家煥然一新！我更加有自信，因為領隊都對我好有信心。」
美國之行預埋巴神
AC教練艾基利就話球隊頭半個鐘踢得好差，但好欣賞佢哋之後表現有改善，入番對手3球。踢完奧迪盃後，AC即刻到美國繼續參加國際冠軍盃，禮拜日會踢4強，對手係車路士或國際米蘭；艾基利話，巴洛迪利同蒙杜利禾等主力都會喺美國之旅上陣。
五六年拍一部戲？講到嬲嬲哋，肥佬黎教王家衛拍戲！
想睇今周足本《亂噏24》？蘋果網站動Live預埋你。
http://bit.ly/appletalk24