干預主義者所推崇嘅產業政策，香港根本不存在實現條件，北京本身有計劃經濟尾巴，唔明白香港與內地有別，好難執行官方主導之產業政策。南韓、台灣經驗顯示產業政策需要官商合謀，政府pick the winner一企業去執行並享受政策優惠，未有民主化前還可以，實現進口替代發展策略。一旦民主化後，官商合謀也難再公然登場。
商界變散沙 金主未夠班
香港係以商貿起家，借內地閉關鎖國時機先走上工業化之路，可以講係歷史偶然，政府從無規劃香港成為世界工廠，發展乜嘢產業，早年紡織製衣興起係因為上海南來紡織大亨，帶來技術及資金，廣東佬製衣廠好快離開本業去靠炒quota發達。至於八十年代崛起之創意產業，更加同政府無關，廣告、設計、港產片、Cantopop、漫畫、電視劇集，完全無任何政府扶植。政府官員最叻係貿易談判，而整個外派經貿辦ETO都係圍繞當時貿易關係建立，同產業政策冇任何關係。
政務官先天及後天均反對有利益傾斜成份的產業政策，一來佢哋唔多曉，二來亦唔信，在官僚眼中任何產業優惠政策，不過是搵公家着數行為。好似幾年前廣東省要騰籠換鳥，港商喊咁口要政府幫，但當政策壓力稍緩，港商又立即無件事，你苦口婆心勸佢地做好R&D，Branding，技術升級，一於睬你有味！
本地商界最國際化只有金融業，而呢班人就最容易流動，全世界周圍走，對本地政治毫不投入，亦無興趣。至於財力最大，當然係地產大孖沙，但過往食住個勢賺錢太容易，早已養成食政治免費午餐習慣，由官僚去處理政策利益，地產大亨第二代無一個走工業家第二代從政之路，勉強得個陳智思算有多少歷練，四大地產家族第二代出現在娛樂版多過政經版，又係唔使有期望。
至於工業家第二代，田北俊兄弟、唐英年為代表，在政治上應比地產佬進步。但舊年睇住有組織有計劃地對唐英年進行人格刺殺，屋宇署之後對唐趕盡殺絕之手法，務必要釘佢入罪，實在是令人心寒，商界內有志從政者幾稀矣！今後行正道有頭有面者還會從政？
商界現時已一盤散沙，冇人有吹雞能力，梁粉金主們未夠班。當商界散收收，官僚抗拒，民意反官商勾結，任何產業政策、優惠政策，都會引發一場風波，當年老董搞數碼港，pick the winner，最終變成地產項目，呢個教訓唔通未夠深刻？
添馬男
杜汶澤、彭浩翔初會蔡瀾、黎智英！仲未睇？
第三集《亂噏24》足本放送中，即上：
http://bit.ly/appletalk24